Гортензияны бик иртә асмағыҙ

Улар йәй буйы сәскә атып ултырһын өсөн эште яҙҙан уҡ башлағыҙ.

Гортензияның төрҙәре күп, ләкин эре япраҡлы сорты айырыуса матур була. Түңәрәк эре алһыу, ҡыҙыл, зәңгәр төҫтәгеләре япраҡтарын ҡаплап ултыра. Был күп йыллыҡ ҡыуаҡ йәй буйына шау сәскәлә ултырһын өсөн уны дөрөҫ итеп туҡландырырға кәрәк. Әлбиттә, эш яҙҙан уҡ башлана.

Апрел айында гортензия эргәһенә 25-30 грамм азофоска гранулы һибеп сығығыҙ. Ҡар өҫтөнә һипһәгеҙ ҙә була.

Шуны иҫтә тотоғоҙ: ҡышҡылыҡҡа ҡапланған гортензияны яҙын бик иртә асырға ярамай. Һауа температураһы төндә 5 градустан күтәрелгәс кенә, ә көндөҙ 10 градус йылы булғанда был эште аҡрынлап башҡаралар.

Тәжрибәле баҡсасылар ҡыуаҡты бер нисә көн алдан ситтәрен генә асып, елләтергә кәңәш итә. Гортензияны асҡас та, ауырыуҙарға бирешмәһен өсөн фундазол менән эшкәртеү яҡшы буласаҡ.

Япраҡтар сыҡҡас, әммә сәскәгә бөрөләнгәнсе йәнә бер тапҡыр туҡландырығыҙ. Биш литр һыуға 1 миллиграмм эпин һәм 10 грамм мочевина ҡушып бутағыҙ һәм шуны иртәнсәк йәки кис ҡыуаҡҡа һиптерегеҙ.

Сәскәгә йомарланған ваҡытта өсөнсө тапҡыр туҡландырырға кәрәк. Биш литр һыуға өс грамм көкөртлө калий  (сернокислый калий), 5 грамм магний сульфаты, 8 грамм көкөртлө аммоний (сернокислый аммоний) ҡушып бутағыҙ һәм гортензияға һиптерегеҙ. Бер нисә аҙнанан һуң ҡыуаҡҡа алһыу төҫтәге шыйыҡ марганцовка иҙелмәһе һибегеҙ.

Сәскә атҡанда 10 литр һыуға 30 грамм суперфосфат, 20 грамм аммиак селитраһы һәм 30 грамм көкөртлө калий ҡушып бутаған шыйыҡсаны һибегеҙ. Август уртаһынан бындай ашлама индерергә ярамай.

Һуңғы туҡланландырыуҙы вегетация тамамланғандан һуң үткәрергә кәрәк. 10 литр һыуға 20 грамм көкөртлө калий һәм суперфосфат йәки 25-30 грамм фосфат монокалий ҡушабыҙ һәм ҡыуаҡҡа һибәбеҙ, аҙаҡ төбөнә тупраҡ өйәбеҙ.

Иҫегеҙҙә тотоғоҙ: гортензияларығыҙ йәй буйына күҙҙең яуын алып ултырһын тиһәгеҙ, сәскәләргә тәрбиә һәм наҙ ҙа кәрәк икәнлеген онотмағыҙ.

Фото һәм сығанаҡ: “Ауыл ҡатыны” төркөмөнән.