Вконтакте facebook Вконтакте Вконтакте
Гәзитте ойоштороусылар:
Башҡортостан Республикаһы
Дәүләт Йыйылышы — Ҡоролтай,
Башҡортостан Республикаһы Хөкүмәте
» » Балҡыштарҙан тора ғүмере
Балҡыштарҙан тора ғүмере Яҡташыбыҙ, Татарстандың халыҡ, Башҡортостандың атҡаҙанған артисы Зөлфиә Шакированың юбилей концерттары республикабыҙҙың барлыҡ ҡала һәм райондарында шаулап-гөрләп үтте. Әйткәндәй, “Ғүмер байрамы” тип аталған ҙур тамаша быға тиклем Рәсәйҙең күп кенә тарафтарында ҙур уңыш менән барҙы. Был кисәгә Зөлфиә сәнғәт училищеһындағы элекке һабаҡташтарын да саҡырғайны. Курсташтарының барыһы ла – танылған сәнғәт оҫталары. Өс сәғәттән ашыу барған концерттарҙан һуң тамашасылар аяғүрә баҫып алҡышланы.

Һәр ижад кешеһенең илһам алыр, һағынып ҡайтыр тыуған яғы бар. Зөлфиәнең һәм уның тормош юлдашы, һөйөклө ире Жәүиттең дә тыуған яғы – Башҡортостандың Саҡмағош районы. Зөлфиә – Юғары Аташ, ә Жәүит Әхмәт ауылынан. Гөлмәрйәм һәм Мәскүр Арыҫлановтарҙың ғаи­ләһендә бишенсе, төпсөк бала булып донъяға килә буласаҡ йырсы. Кесе йәшенән үк мәктәп, район кимәлендәге төрлө сараларҙа ҡатнашҡан Зөлфиә менән Жәүит шул ваҡыттарҙа уҡ бер-береһенә иғтибар итә. Тора-бара дуҫлашып китәләр. Бына утыҙ йыл инде улар бер-береһен яратып, башҡаларға өлгө булып йәшәй, ижад итә.
Мәктәпте тамамлағас, Жәүит – Стәр­летамаҡ мәҙәни-мәғрифәт учили­ще­һына, ә Зөлфиә йырсылыҡҡа уҡыу өсөн Өфөгә юллана. Аралар уҡыған йылдарҙа ла һыуынмай, киреһенсә, һөй­гән йәрҙәр бер-береһенә тартыла. Жәүит уҡыуын бөтөрөп, Ҡазанға Ғ. Ка­мал исемендәге театрға актер булып эшкә алына. Зөлфиә иһә, учили­щены тамамлағас, Өфө дәүләт сәнғәт институтының вокал бүлегенә уҡырға инә. Бер йыл уҡығандан һуң йәштәр өйләнешергә була, төрлө ерҙә йәшәп булмай бит.
Зөлфиә лә ире менән Ҡазанға китә, унда консерваторияла уҡыуын дауам итә. Мәшһүр педагог, профессор Зө­ләйха Хисмәтуллина класында шөғөл­ләнә башлай. Күп уҡырға тура килмәй унда. Уҡытыусыһы: “Зөлфиә! Әгәр операла йырларға теләгең булһа, артабан уҡы. Ә эстрада өсөн инде һинең тауышың әҙер, юҡһа, тәбиғи моңоңдо юғалтыуың бар”, — ти. Уҡытыусы­һының кәңәшен тотоп, Зөлфиә Татар дәүләт филармо­нияһына эшкә бара. Зифа буйлы, моңло тауышлы ҡыҙҙы һис һүҙһеҙ эстрадаға эшкә алалар. Жәүит — театрҙа, Зөлфиә филармонияла эшләй. Йәшәргә урын юҡ, хатта күпмелер ваҡыт өс ғаилә бер бүлмәлә йәшәп ала. Сит республикала туған­дары ла, ярҙам итерлек кешеләре лә юҡ. Йәшәгән ятаҡтары ҡасандыр мәшһүр композитор Сәлих Сәйҙәшев көн иткән йорт булып сыға. Йорт-музей итер өсөн торлаҡты буша­тырға ҡушалар. Юҡ, урамға ҡыумайҙар йәштәрҙе, ике бүлмәле фатир бирәләр. Шатлығының иге-сиге булмай йәш ғаи­ләнең. Ҡазан һынлы Ҡазандың үҙәгендә фатирлы бул әле!
Актер булараҡ театрҙа эшләүҙең перспективаһын күрмәй Жәүит. Ҡа­тыны эшләгән ергә концерттарҙы алып барыусы булып урынлаша. Зөлфиә йырлай, Жәүит нәфис һүҙ оҫтаһы булараҡ таныла. Йәштәргә үҙҙәренә айырым концерт бригадаһы төҙөргә тәҡдим итәләр. Коллектив туплана, танылған баянсы Кирам Сатиев килә. Шунда инде Зөлфиә Шакиро­ваның лидерлыҡ һәләте, концерт тоторлоҡ йырсы булыуы асыҡлана. Туҡтауһыҙ гастролдәргә йөрөйҙәр. Илһам һәм Искәндәр исемле улдары тыуа. Ба­лаларҙы ҡарашыр кеше юҡ, аптырағас, Саҡмағошҡа ҡайтарып торалар. Шулай итеп, балалары ике республиканы ла үҙ итеп буй еткерә.
Тик йәштәрҙән торған коллективты тамашасы бик яратып ҡабул итә. “Бер ваҡытта ла гастролдәргә сыҡмай ҡал­маным, ауырыған саҡта ла “больничный” алманым. Һәр ваҡыт филармонияла концерт планын үтәү буйынса беренсе урында бара инек. Район үҙәктәрендә бишәр көн рәттән концерттар биргәнебеҙ булды”, – тип хә­терләй Зөлфиә. Биш йыл эшләй улар филармонияла. Туҡ­һанынсы йылдарҙа эстрада бүлеген ябалар, шулай ҙа Шакировтарҙың төркөмөн ҡалдыра­лар.
Ижад кешеһе ирекле булырға тейеш, тип Жәүит менән Зөлфиә лә, филармониянан китеп, үҙаллы эш­ләр­гә ҡарар ҡыла. Был ҡыйыу аҙымға барыу еңел булмай, әлбиттә. “Башта бәләкәй автобус, аппаратура һатып алдыҡ, сәхнә костюмдары тектерҙек. Төрлө сараларҙа, һабантуйҙарҙа, банкеттарҙа сығыш яһай башланыҡ, – тип хәтерләй Жәүит Шакиров. – Рек­ламаға күп көс сарыф иттек. Телевидение, радионан сығыштар яһаныҡ. Йыл һайын яңы программа эшләйбеҙ. Бөтә Рәсәй буйлап тулы залдарҙа сығыш яһайбыҙ икән, был — туҡтауһыҙ эш һөҙөмтәһе. Татарстанда артистар бик күп, әммә, Аллаға шөкөр, беҙҙең кеүек халыҡ йыя алған коллектив биш-алты ғына”.
Жәүит Шакиров – танылған нәфис һүҙ оҫтаһы. Сәхнәнән һөйләгән барлыҡ әҫәрҙәрен дә үҙе яҙа. Ул шулай уҡ шағир ҙа, моңло тауышлы йырсы ла. Зөлфиә Арыҫланова-Шакирова Өфө сәнғәт училищеһында уҡығанда уҡ ҙур концерттарҙа йырлай ине. Уның ижадын күптән инде күҙәтеп барам. Репертуары бик бай. Йырсының тәбиғи һәләтен үҫтерергә танылған педагог, профес­сорҙар Фәрзәнә Сәғитова менән Зөләйха Хисмәтуллина ярҙам иткән.
Халыҡсан тауышлы Зөлфиә Ша­киро­ваның йырҙары тамашасының күңеленә хуш килә. Татар һәм башҡорт компо­зиторҙарының эстрада йырҙары менән бер рәттән халыҡ йырҙарын да оҫта башҡара ул. Башҡорт халыҡ йырҙары ла бар репертуарында. “Шаһибәрәк”, “Каруанһарай”, “Һыу өҫтө”, “Элмәлек” йырҙарын да юғары кимәлдә йырлай.
Зөлфиә Шакирова композитор була­раҡ та билдәле. Күп йырҙарының тексын Жәүит Шакиров яҙған. Был йырҙарҙы улар үҙҙәре генә башҡар­май, танылған йырсылар Рөстәм Асаев, Зөһрә Шәри­фуллина, Бәширә Насирова, Нәзифә Ҡадироваларҙың да репертуарына ингән. Үҙе яҙған көй­ҙәрҙе туплап, Зөлфиә “Һин – япраҡ, ә мин – сәскә” тигән йыйынтыҡ та баҫтырып сығарған.
“Зөлфиә Шакированың көйҙәре йыр­ҙарҙың һүҙҙәренә тап килә. Шиғри юлдарҙы күңеле аша уҙғарып, йөрәккә үткәндәрен генә һайлап алып яҙа ул. Шуға күрә йырҙары тыңлаусының мө­хәббәтен яулап ала, уйландыра, ҡабат-ҡабат күңелендә яңырта”, – ти йыйын­тыҡтың баш һүҙендә композитор, Та­тарстандың атҡаҙанған сәнғәт эшмәкәре Риф Ғатауллин. Күп кенә йырҙарҙы тормош иптәше менән парлап башҡарыуы үҙе бер бәләкәй генә спектакль. Һәр хәрәкәт, ҡараштар уйланылған. Йыр, бейеүҙәр, сатира-юмор бергә үрелеп бара. Сәхнә би­ҙәлеше, артистарҙың костюмдары ла бик матур, сағыу. Буй еткергән ике улға әсәй, шулай уҡ өләсәй булһа ла, йылдар төҫ-ҡиәфәтен дә, ихлас холҡон да үҙгәртмәгән Зөлфиәнең.
Зөлфиә Шакирова әсә булараҡ та бик бәхетле. Өлкән улдары Илһам инде үҙе атай. Ҡазан (Волга буйы) федераль университетында уҡыта, йырларға ярата, бәләкәйҙән ҡурай моңона ғашиҡ. “Хатта кеҫә телефонына ҡурай моңон яҙҙырып ҡуйған”, – ти әсәһе. Кесе улы Искәндәр – Ҡазан дәүләт төҙөлөш универси­тетының беренсе курс студенты. Улдары ата-әсәләренең ижадын күҙәтеп бара, яҡын итә.
Шакировтарҙың бөтә тормошо халыҡтың күҙ алдында бара. Унда төрлө ғәйбәткә, имеш-мимешкә урын юҡ. Шуны ла әйтеп үтәйем: Зөлфиә бер нисә йыл элек ситтән тороп Баш­ҡорт дәүләт педагогия университе­тының музыка бүлеген тамамланы. Ул һәр ваҡыт үҫеш юлында.
Тағы ла Өфөләге юбилей концертына әйләнеп ҡайтайыҡ. Зөлфиә Шакироваға тамашасылар ҙа, бергә уҡыған йәшлек дуҫтары ла бик матур һүҙҙәр әйтте. Курсташтарҙың ҡайһы бер фекерҙәрен яҙып үтәм. Уларҙы мин үҙем өсөн дәфтәремә тер­кәгәйнем.

Вахит ХЫЗЫРОВ, Башҡортостандың халыҡ артисы:
— Зөлфиәне тыуған Башҡортостаныбыҙҙың сәскәләргә, алҡыштарға күмеүе бер ҙә осраҡлы түгел. Уны халыҡ ярата. Йырсыға бәхет теләйем.

Флорида ИСМӘҒИЛЕВА, Башҡортостандың атҡаҙанған артисы:
— Зөлфиәгә ҡарап хайран ҡалам! Йырлай, шиғыр һәм көй ҙә яҙа. Ул үҙенә модельер, визажист, парикмахер ҙа. Ҡул эшенә, аш-һыуға оҫта. Алдағы көндәре яҡты, матур, пар ҡанатлы, мөхәббәтле, йырлы-моңло булһын!

Харис ШӘРИПОВ,
йырсы, Рәсәй һәм Башҡортостан Журналистар союзы ағзаһы.




Беҙҙе Яндекс Дзен лентаһында уҡығыҙ

В ОдноклассникахВконтакте

Комментарий өҫтәргә






"Иҙел башы" менән "Арғымаҡ" осрашһа...

"Иҙел башы" менән "Арғымаҡ" осрашһа... 30.03.2019 // Әҙәбиәт

Белорет районының Абҙаҡ мәктәбендә әҙиптәр менән осрашыуҙар даими үтеп тора....

Тотош уҡырға 1 649

Шәйехзада БАБИЧ Өмөт ҡайнап, ташып күкрәгемдән, Көтәм тиҙҙән аҡ көн тыуғанын...

Шәйехзада БАБИЧ Өмөт ҡайнап, ташып күкрәгемдән, Көтәм тиҙҙән аҡ көн тыуғанын... 29.03.2019 // Әҙәбиәт

28 мартта Башҡортостан Автономияһы көрәшсеһе, азатлыҡ йырсыһы, башҡорт халҡының арҙаҡлы улы, шағир...

Тотош уҡырға 2 022

Беҙ “Пионер”ҙа тәрбиәләндек!

Беҙ “Пионер”ҙа тәрбиәләндек! 29.03.2019 // Әҙәбиәт

Мин бәләкәй саҡта ул журнал “Пионер” тип атала ине. Беҙ уны шул тиклем яратып, көтөп алып уҡыныҡ....

Тотош уҡырға 1 535

Бала саҡ иле баҫмаһы

Бала саҡ иле баҫмаһы 29.03.2019 // Әҙәбиәт

Алыҫ 1929 йылдың мартында Башҡортостан балалары “Керпе” тип аталған йөкмәткеле һәм ҡыҙыҡлы...

Тотош уҡырға 1 748

Тоғролоҡта ғына ул дуҫлыҡ бар, Тик дуҫлыҡта ғына хаҡлыҡ бар

Тоғролоҡта ғына ул дуҫлыҡ бар, Тик дуҫлыҡта ғына хаҡлыҡ бар 27.03.2019 // Әҙәбиәт

Башҡортостан – тиңдәргә-тиң илем, Һиндә һалдыҡ дуҫлыҡ һарайын. Таңдай балҡып һинең килер көнөң,...

Тотош уҡырға 1 568

“Китапты йөкмәткеһе өсөн уҡымайым”
Каникул тылсымға бай булмаҡсы

Каникул тылсымға бай булмаҡсы 23.03.2019 // Әҙәбиәт

Учалыла “Бөйөк тылсымсы – театр” тип исемләнгән балалар китабы аҙналығы башланды....

Тотош уҡырға 1 433

“Башҡортостан – баш йортобоҙ”

“Башҡортостан – баш йортобоҙ” 22.03.2019 // Әҙәбиәт

Зәйнәб Биишева исемендәге Башҡортостан “Китап” нәшриәтендә уҙған түңәрәк өҫтәл ошолай атала....

Тотош уҡырға 1 489

Һин дә флешмобҡа ҡушыл!

Һин дә флешмобҡа ҡушыл! 21.03.2019 // Әҙәбиәт

Бөгөн – Бөтә донъя шиғриәт көнө. Уның тарихы тамырҙары менән 1999 йылға барып тоташа: Францияның...

Тотош уҡырға 1 381

Яҡтыкүлгә яҡтылыҡ өҫтәп

Яҡтыкүлгә яҡтылыҡ өҫтәп 20.03.2019 // Әҙәбиәт

Әле Әбйәлил районының Яҡтыкүл шифаханаһында бер төркөм яҙыусылар һаулығын нығыта, ял итә. Ошо...

Тотош уҡырға 1 643

Әҙәбиәт һөйөүселәрҙе "Бабич" бергә тупланы

Әҙәбиәт һөйөүселәрҙе "Бабич" бергә тупланы 20.03.2019 // Әҙәбиәт

Баймаҡ биләмә-ара үҙәк китапханаһында әҙәбиәт һөйөүселәр һәм яҙыусылар араһында йылы күпер һалыуға...

Тотош уҡырға 1 374

Фәнзил САНЪЯРОВ:  "Меңйыллыҡтар ҡайҙа барғанда ла, Уралымда йәшәр шиғриәт!"

Фәнзил САНЪЯРОВ: "Меңйыллыҡтар ҡайҙа барғанда ла, Уралымда йәшәр шиғриәт!" 20.03.2019 // Әҙәбиәт

Ҡоролтайға әҙерләнәм Башҡорттарым Йәнә ҡор йыясаҡ, Бишенсегә үтер Ҡоролтай. Кәңәш-төңәш итер мәл...

Тотош уҡырға 1 545