Республикабыҙҙа эҙәрмәндәр хәрәкәте киң йәйелдерелгән. Был йәһәттән өлкән класс уҡыусылары айырыуса әүҙем. Өфөлә үткәрелгән “Еңеүселәр вариҫтары” тигән сара барышында Хәйбулла районынан килгән ирекмәндәр менән осраштыҡ.

– Саҡырыуҙы ихлас ҡабул иттек, ара­ларҙың алыҫлығы өркөтмәне, – тине Һамар урта мәктәбе директоры Рафаэль Кәримов. – Яугирҙәр хаҡында мәғлү­мәт­те мөмкин тиклем күберәк тупларға, халыҡҡа таратырға кәрәк, был йәштәрҙе ватансылыҡ рухында тәрбиәләү өсөн бик мөһим.
Уҡыу алдынғылары Айгизә Исмә­ғи­лева менән Ләйсән Әбләева – район­дағы эҙәрмәндәр отрядының иң сәмсел ағзалары. Ошо көнгә тиклем Бөйөк Ва­тан һуғышында хәбәрһеҙ юғалған 160-ҡа яҡын кешенең исемен асыҡлауға үҙ өлө­шөн индергән улар. Әйткәндәй, икеһе­нең дә ғәзиз кешеләре Гитлер фа­­шис­тарына ҡаршы көрәштә ҡатнаш­ҡан.
– Ҡартатайым Сәйфелмөлөк Ҡотло­баев беренселәрҙән булып фронтҡа киткән, дошманды илебеҙҙән ҡыуғанда үҙен һис кенә лә аямаған, – тип һөйләй Айгизә. – Уның менән сикһеҙ ғорур­ланам, мәғлүмәт туплай барам. Бүтән­дәр белһен, күрһен – бына ниндәй батыр булған ата-бабам!
Ләйсәндең һүҙҙәренә ҡарағанда, Сәмиғулла Әбләев хаҡында матбуғатта күп мәҡәлә донъя күргән. Тәүҙәрәк ҡарта­та­һы тураһындағы яҙмаларға күҙ йүгертеп ке­нә сыҡҡан булһа, хәҙер һәр береһен иғ­ти­бар менән уҡый, хатта йыйып бара ҡыҙ.
“Был йәштәр һәммәһенә лә нисек өл­гөрә?” – тип аптырап та ҡуяһың. Баҡ­ти­һәң, улар ваҡытты дөрөҫ бүлергә өй­рән­гән, кәрәкмәгән ваҡ-төйәккә иғтибарҙы йү­нәлтмәй, шуға барыһы ла уң килеп тора.
Әхирәттәр баш ҡалала беренсе тап­ҡыр түгел, әммә килгән һайын Өфөнө яңы­нан асабыҙ, тиҙәр. Мәҫәлән, быйыл Салауат Юлаев һәйкәле янындағы май­ҙандың танымаҫлыҡ итеп үҙгәртелеүе, урамдарҙың иркенерәк, йорттарҙың ҡуп­шы­раҡ була барыуы ҡыуандырған уларҙы.