Бәпембә генә тимәгеҙ...

Унан бына тигән ҡайнатма ла әҙерләйҙәр. Яҙып алығыҙ.

Элек-электән был сәскәнең япраҡ­тарын авитаминоз, аҙ ҡанлылыҡ, бөйөр сирҙәре, ашҡаҙан-эсәк ауырыуҙары, ағыуланыу осраҡтарында дауа булараҡ ҡулланалар.

Бәпембә япрағы ҡушылған салат үт, бәүел ҡыуыуға, аппетит­ты асыуға, аш һеңдереүҙе яйға һалыуға булышлыҡ итә. Тамырҙарын картуф уры­нына табала ҡурырға мөмкин, ти бәғзеләр.

Медицинала бәпембәнең сәскәһен, тамырын, япрағын киң файҙала­на­лар. Диетологтар тәҡдим иткән ашам­лыҡтар араһында ла ул беренсе урынды биләй. Ул холестерин кимәлен кәметә, ауыртыуҙы баҫа, бәүел ҡыуғанда организмды калий менән тәьмин итә. Вита­миндарға, аҡһымға, шәкәргә, анти­окси­данттарға бай үҫемлек яман шеш, диабет сир­ҙә­ре­нән һаҡ­лай. Бә­пем­бә һутын бит­тәге һипкелгә, ҡара нөктәләргә, тәндәге асыҡ яраға, бешкән урынға һәм һөйәлгә һөртәләр.

Бәпембәне  иртән, ысыҡ ҡороғас, йыйырға кәңәш итәләр. Тамырын иртә яҙ йәки көҙ ҡа­ҙып алырға була.

Бәпембәнән ҡайнатма

Түбәндә бәпембәнән ҡайнатма тәҡдим итәбеҙ. Бының өсөн 200 бөртөк бәпембә сәскәһе, 750 грамм шәкәр, бер лимон, ярты литр һыу кәрәк. Сәскәләрҙе һабағын ҡал­дырмай ҡырҡып алабыҙ һәм ағып торған һыуҙа йыуып һарҡытабыҙ. Эмалле кәстрүлгә һалып, ҡайнар һыу ҡоябыҙ. Ҡайнап сыҡҡандан һуң утын кәметәбеҙ ҙә тағы 10 минут тотабыҙ, ағас ҡалаҡ менән болғатып торабыҙ.

Уттан алғас, бер көнгә ошо килеш ултыртып ҡуябыҙ. Бик тиҙ кәрәк булған осраҡта 20 минут самаһы тоторға мөмкин. Шунан ике ҡат марля аша һөҙөп, шәкәр, ваҡ ҡына итеп туралған лимон ҡушабыҙ. Шәкәре иреп бөткәс, талғын ғына утта 20-30 минут ҡайнатабыҙ. Эҫе килеш стерил­ләнгән банкаға һалып ҡаплайбыҙ.

Ҡулланыр алдынан табип менән кәңәшләшергә онотмағыҙ!

Автор фотолары