– Һөйөү нимә? – тинем ир кешегә.
– Ҡатын өсөн тамуҡтарҙы үтеү.
– Һөйөү нимә? – тинем мин ҡатынға.
– Ғаләмдәрҙә янып көлгә ҡалған ирҙе көтөү.

* * *

Ғишыҡ тотоп йәшәр өсөн бихисап түҙемлек, сабырлыҡ кәрәк. Түҙемһеҙ кеше ғишыҡ тотоп маташмаһын да ул.

* * *

Төҙәлә. Бөтәһе лә төҙәлә. Тик өҙөлгән өмөт менән ҡалған хәтер генә төҙәлмәй.

* * *

Һабантуй митинг та, театр ҙа түгел. Ул – кешеләрҙең күңелен хистәрҙән юғары күтәргән иң бейек, илаһи күренеш (илһөйәрлек тураһында).

* * *

Беҙ булғанбыҙ, барбыҙ, буласаҡбыҙ.
Үҙебеҙҙең йырыбыҙҙы йырлап
Тарих арбаһында барасаҡбыҙ.

* * *

Мәңгелек өсөн дә, миҙгел өсөн дә закон бер. Был йәһәттән мин үҙ милләтем тураһында уйлайым. Рухи йәшәйешендә ул юғары күтәрелеш­тәргә лә ирешкән, ҡуңалтаҡлыҡ та кисергән. Шулай ҙа оҙон-оҙаҡ тарих юлында үҙенең ижади ҡеүәтен, һәләтен, илһамын юғалтмай һаҡлап килгән.

* * *

Кешеләрҙән уңдым. Улар мине
Өйрәтте, тик юҡҡа ҡаҡманы.
Дуҫтарымдан уңдым. Улар керҙе
Ҡағып тормай ғына ҡапҡаны.

* * *

Ололай бел хужа хаҡын, хөрмәт күрәм тиһәң, маҡта уның атын.

* * *

Аяҡ баҫһаң үләндәре
Торғаны бәрхәт инде,
Шул тупраҡта тыуып үҫеү
Үҙе бер бәхет инде.

* * *

Ғәҙәт – ҡылыҡтың энеһе.

* * *

Ваҡытҡа ҡояш баш түгел,
Уға мөхәббәт хужа.

* * *

Әҙәми заттың ер тетрәүҙән, туфан ҡалҡыуҙан, йыһанда килеп тыуған фажиғәләрҙән түгел, хатта атом һуғышынан да түгел, ә араҡынан, наркотиктарҙан, ядро ҡалдыҡта­рынан, зарарлы газдарҙан, компьютер нурҙары ағымынан, рухи тарҡалыуҙан һәләк булыуы ихтимал, әгәр бөгөн аҡылыбыҙға килмәһәк.

* * *

Һәр кем үҙ тауына үҙ мәлендә менергә тейеш.

* * *

Егеттәр теле әйткән һүҙ – ҡырҡылып ауған имән.

* * *

Ирҙәрҙең күбеһе мөхәббәт ағасын ҡарарға, үҫтерергә, һаҡларға атлығып бармай, бары емешен генә өҙөргә ярата. Мөхәббәттең яуаплылығынан, хатта мәшәҡәтенән ҡурҡа улар. Был тәңгәлдә ҡатын-ҡыҙҙарҙың өстән икеһе тәүәккәл булһа, ирҙәрҙең шул саҡлыһы уҡ ҡурҡаҡ.

* * *

Алыҫ юлға эйәрләйҙәр аттарҙың иң яҡшыһын, ҙур йомошҡа ебәрәләр ирҙәрҙең иң затлыһын.

***

Тәкәбберлек! Һинән башҡа ла бар
Был донъяла байтаҡ нәмәләр –
Ерҙә йөрөй әле йәйәүлеләр,
Һыуҙа йөҙә әле кәмәләр.