Яңы театр миҙгелен тамашасы һәр ваҡыт түҙемһеҙлек менән көтөп ала. Салауат ҡалаһы халҡының да спектаклдәргә нисек һыуһағанын залда бер генә буш урындың булмауынан аңларға мөмкин ине.

Был юлы миҙгел Эсфир Йәһү­ҙин­дың “Көтмәгәндә булған хәл” комедияһы менән асылды. Уны сәхнәгә режиссер Илдар Вәлиев ҡуйҙы. Тамашасы актерҙар менән бергә янып көйҙө, шатланды, уйланды.

Премьера тамамланғас, тамашасылар менән әңгәмә ҡороу мөмкин булды. Роза менән Рәйес Бикмөхәмәтовтар – 70 йәште уҙған оло йәштәге кешеләр.

– Бик матур булды. Күңелгә бөтмәҫ ял, кинәнес алдыҡ. Дөрө­ҫөн әйткәндә, театрға бик йөрөгә­небеҙ юҡ ине. Беҙҙе ошондай матур кисәгә балаларыбыҙ саҡырҙы. Актерҙар шул тиклем ихлас, ябай уйнай. Артабан да бында юлды һыуытмаҫҡа уйлап торабыҙ әле, – тине улар, йылмайып.

Быйыл Салауат башҡорт дәүләт драма театры өсөн айырыуса иҫтәлекле йыл, сөнки ул үҙенең 85 йыллығын билдәләй. Шул йәһәттән тантаналар, ҡотлауҙар дауам итә. Спектакль тамамлан­ған­дан һуң, күптәр йылы һүҙҙәр, ихлас теләктәр менән сығыш яһаны. “Салауат” гәзите редакция­һы ла ситтә ҡалманы, йыл башында сәнғәт йортоноң юбилейы айҡан­лы иғлан ителгән шиғырҙар конкурсына йомғаҡ яһаны. Унда талантлы апай-ағайҙар теләп ҡат­нашып, театрға һөйөүен белдерҙе. Конкурс лауреаттары Гөлсирә Фәйзуллина, Флүрә Хәзиева, Мәйсәрә Хәйерова, Самат Мостафин һәм Мөҙәрис Багаев диплом, бүләктәр алып ҡыуанды.

– Бөгөн иҫ киткес матур тама­шаға шаһит булып, шатланып ултырҙыҡ. Яңы миҙгелдән ошондай уҡ матур, сағыу тамашалар өмөт итәбеҙ. Театр менән гәзит тығыҙ хеҙмәттәшлек итә, коллектив һәр башланғысты күтәреп сыға. Киләсәктә лә берҙәм була­йыҡ, бергә ҡалайыҡ, – тине “Салауат” гәзитенең баш мөхәррире Сибәғәт Рахманғолов. Ул шулай уҡ театр ди⁠ректоры Илдар Ман­на­повҡа, ижади коллективҡа етәк­селек иткән Рөстәм Фазыловҡа, әҙәби бүлек мөдире Динә Бәшироваға Рәхмәт хаттары тапшырҙы.