Благовар районының Пришиб ауылы немецтар йәшәүе менән күптәргә билдәлелер. Ошо көндәрҙә унда Германиянан студенттар ҡунаҡҡа килде. Әйткәндәй, бындай ваҡиғалар күптән инде яҡшы йолаға әүерелгән.

Студенттарҙы концерт менән ҡаршы­ла­нылар, немец йырҙары яңғыраны, дәрт­ле бейеүҙәр башҡарылды. Урындағы немец мәҙәни үҙәгендә баш белгес Юлия Артес ойошманың, музейҙың эшмәкәрлеге, “Weinachten”, “Ostern” байрамдары, Изге Мартин көнө, шулай уҡ район биләмәһендә йәшәгән башҡа халыҡтарҙың милли байрамдары тураһында һөйләне. Ҡунаҡтар немецтарҙың бында күсеү тарихын йотло­ғоп тыңланы.

Украинанан атҡа атланып әлегәсә билдәһеҙ яңы урынға күсеп, тормош башлауҙары тураһындағы сәхифә­ләргә ышаныуы бик ҡыйын ине. Йәштәр Пришиб ауыл модель китапханаһында ла булды. Күп милләтле районда урынлаш­ҡанға күрә, китапханала биш телдә әҙәбиәт тупланған. Китапханасы Марина Бобб балаларҙың ҡул эштәрен күрһәтте. Ҡунаҡтар иһә немец телен­дәге китаптарҙы бүләк итте. Германия студенттарын милли аш-һыу менән һыйланылар.

Белеүебеҙсә, Пришиб ауылында илле йылдан ашыу инде “Volksklang” немец халыҡ фольклор ансамбле эшләй. Ул ауылда, ра­йонда һәм республикала үткәрелгән сара­ларҙың барыһында ла тиерлек ҡатнаша. Ансамбль 1956 йылда ойошторолған. “Халыҡ ансамбле” исеме 1990 йылда бирелгән. Коллективтың етәксеһе – Светлана Кунц, төп составта – 13 кеше. 2008 йылда мәҙәни алмашыу тәртибендә Германияла булып ҡайтҡандар.

Әйткәндәй, Светлана Кунц сентябрь айы йомғаҡтары буйынса “Минең телем — дуҫлыҡ теле” республика акцияһында еңеп сыҡҡан. Ул немец халыҡ йыры оҙатыуында “Баҡсала” шиғырын уҡыған. Белеүебеҙсә, был конкурс Башҡортос­тандың дәүләт телдәрендә, республикала йәшәгән халыҡтарҙың туған телдәрендә Ватан, туған тел тураһында шиғырҙарҙы тасуири уҡыуҙы күҙаллай.