Германияның Майндағы Франкфурт ҡалаһынан бик яҡшы хәбәр килде. Де Ришелье исемендәге халыҡ-ара әҙәби-нәфис бәйгенең һөҙөмтәләре буйынса, күренекле Рәсәй яҙыусыһы, сатиригы, шағир һәм публицист Марсель Сәлимов “Шиғриәт” номинацияһының лауреаты һәм “Төньяҡ амурҙары вариҫтары” шиғыры өсөн “Бриллиант Дюк”ка лайыҡ булды (ул “Франция, мөхәббәтем минең” проекты нигеҙендә башҡортсанан тәржемә ителде.)

Был – Одесса ҡалаһына нигеҙ һалған герцог Эммануэль Арман де Решилье исемен йөрөткән халыҡ-ара бәйге, ул 1998 йылдан алып GLORIA Халыҡ-ара әҙә­биәт һәм сәнғәт эшмәкәрҙәре ассоциацияһы тарафынан үткә­релә. Штаб-фатиры Майндағы Франкфурт ҡалаһында урынлаш­ҡан был конкурс “Ҡотҡар һәм һаҡ­ла” мәҙәни проектына ярашлы башланған. Сараны донъя­ның һигеҙ ҡалаһының вәкилдәре менән берлектә күренекле ша­ғирә, журналист һәм сәнғәт әһеле Елена Ананьева етәкләй һәм ойоштора. Ул иһә сығышы менән Одессанан. Үҙ эсенә күп яҡлы бәйгеләрҙе алған был конкурс үҙәк, төбәк һәм урындағы мәҙә­ниәт, сәнғәт бүлектәре ярҙа­мында асыҡ финалдар рәүе­шендә уҙғарыла. Йола буйынса, һәр йылдың сентяб­рендә ҡала көнөндә “Одессаның көнбайыш һәм көнсығыш сәнғәте музе­йы”нда тантаналы рәүештә де Ришелье исемендәге халыҡ-ара бәй­генең еңеүселәре иғлан ителә.
Быйыл унда күренекле сатири­гыбыҙ менән бергә “Бриллиант Дюк”ты тағы ла Анатолий Аврутин (Минск, Белоруссия), Эдуард Амчиславский (Нью-Йорк, АҠШ), Гурген Баренц (Хьюстон, АҠШ), Ристо Василевский (Смедерово, Сербия), Светлана Дион (Мадрид, Испания), Татьяна менән Сергей Дзюбалар (Чернигов, Украина), Михаил Спивак (Виннипег, Канада), Мәскәүҙән Александр Хорт һәм башҡа яҙыусы, шағир, публицистар яуланы.
Ә Марсель Сәлимовтың 1812 йылғы Ватан һуғышындағы еңеү­ҙең 200 йыллығына арналған “Француз исемле башҡорт сатири­гының амур уҡтары” тигән шиғри циклы иһә Мәскәүҙең “Хәҙерге урыҫ әҙәбиәте” йыйын­тығында француз телендә баҫылып сыҡты.
– Мәскәүҙә Евразия халыҡтары ассамблеяһының I съезында мин Франциянан килгән ғәжәп ҡыҙыҡ­лы шәхес менән осраштым. Ул “Франк Рәсәй диалогы” ассоциа­цияһының вице-президенты, Евразия халыҡ­тары ассамблея­һының рәйестәше Бернар Лозе ине, – тип хәтирәләре менән уртаҡлашты Марсель Шәйнур улы. – Ә мсье Бернар “Ни өсөн исемең французса?” тип һорағас, мин уға “Төньяҡ амурҙарының вариҫтары” тигән шиғырымдың французсаға тәржемәһен уҡыт­тым һәм ул шиғырымдан ҡәнәғәт булмаҫ тип көттөм. Ә ул ҡулымды ҡыҫты ла: “Супер, мсье Марсель! Шулай булды ла: көтөлмәгәндә Рәсәйгә килгән “ҡунаҡ” Наполеонды башҡорт­тар өйөнә тиклем дөрөҫ “оҙатты!” – тип шат­лығын йәшермәне.
Әйткәндәй, ижади камиллығы, әүҙем әҙәби эшмәкәрлеге, әҙә­биәт, мәҙәниәт, ағартыу эшенә һәм гуманизм йолаларына тоғ­ролоғо өсөн Марсель Сәлимов “Генрих Бёллдың Халыҡ-ара миҙалы” менән бүләк­ләнде. Ул шулай уҡ Евразия әҙәбиә­тен тулыландырғаны, халыҡ-ара мәҙәни проекттарҙа әүҙем ҡат­наш­ҡаны һәм ижади ҡаҙаныш­тары өсөн Германияның Әҙәби­әт, сәнғәт, коммуникациялар ха­лыҡ-ара академия­һының ағзаһы итеп һайланды.