Республикала тырыш, уңған хеҙмәткәрҙәрҙе тәбрикләү, уларҙың тырыш хеҙмәтен баһалау матур йолаға әүерелде. Ошо көндәрҙә сәнәғәт, дәүләт хеҙмәте, мәғариф, мәҙәниәт һәм сәнғәт, матбуғат, һаулыҡ һаҡлау, транспорт һәм башҡа өлкәләрҙә эшләгән 57 хеҙмәткәрҙең һөнәри ҡаҙаныштары ордендар, почет грамоталары һәм маҡтаулы исемдәр менән билдәләнде.

Республика Башлығы Рөстәм Хәмитов, бүләк­ләнеүсе­ләрҙе тәбрик­ләп:
– Бөгөн һеҙ Рәсәй Федерация­һының һәм Башҡортостан Республи­ка­һының дәүләт наградаларын ала­һығыҙ. Бын­да төрлө өлкәлә хеҙмәт иткән кешеләр йыйылған. Һәр тармаҡтан да белгес булыуына мин бик шатмын. Һеҙгә, коллективығыҙға рәхмәт. Артабан да республика мәнфәғәтендә эшләргә насип булһын. Һаулыҡ, уңыштар теләйем, – тине.

Юғары уңышҡа өлгәшкән хеҙмәткәрҙәрҙең бары­һын да күп йылдар төрлө өлкәлә яратып һәм тырыш­лыҡ һалып башҡарған эштәре берләштерә. Награда алғандар үҙ сиратында ҡыуаныс һәм рәхмәт һүҙҙәрен еткерҙе. Мәҫәлән, “Башҡортостан” телерадиокомпанияһының “Яңылыҡтар” тапшырыуын алып барған Флүрә Мурзинаға “Рәсәй Федера­цияһының атҡаҙанған мәҙәниәт хеҙмәткәре” тигән маҡтаулы исем бирелде.
– Бөгөнгө көн шул тиклем хәйерле, сөнки ошо залға йыйылған һәр кем үҙенең тырыш хеҙмәтенә юғары баһа ала. Мин дә был награданы 35 йыл телевидениела эшләүемә оло хөрмәт тип ҡабул итәм. Ошо дәүерҙәге барлыҡ хеҙмәттәштәремә рәхмә­тем­де еткерәм, – тип ҡыуанысы менән уртаҡлашты.
Республика Башлығы “Витязь” машиналар эш­ләү компанияһының генерель директоры Ирек Арыҫла­нов менән Башҡортостан Ҡатын-ҡыҙҙар союзы етәксеһе Рәшиҙә Солтановаға Салауат Юлаев ордендарын тапшырҙы.
– Был бүләкте ҡатын-ҡыҙҙар ойошмаһына ҡара­та хөрмәт тип ҡабул итәм. Дәүләт тарафынан ғаилә, балалар, әсәлек мәсьәләләренә иғтибар булғанда респуб­ликаның киләсәге өмөтлө, – тине Рәшиҙә Искәндәр ҡыҙы үҙ сығышында.
“Башҡортостан Республикаһының атҡаҙанған артисы” исеменә лайыҡ булған йырсы Радик Юлъяҡ­шин да шатлығы менән уртаҡлашты:
– Был – минең тәүге наградам. Хеҙмәтемде юғары баһалағанығыҙ өсөн рәхмәт. Маҡтаулы исем иңемә ҙур яуаплылыҡ һала, яңынан-яңы үрҙәргә илһам­ландыра. Маҡсатым – туған телебеҙҙе, мәҙәниә­тебеҙҙе бөтә илгә танытыу. Әлеге ваҡытта ошоноң менән шөғөлләнәм. Тәүге аҙымдар үҙен оҙаҡ көттөрмәҫ, – тине ул.
Хәйбулла районынан Рөстәм Аблаев “Бүребай тау-байыҡтырыу комбинаты” акционерҙар йәмғиә­тенең генераль директоры вазифаһында – алты йыл. “Йәш кеше булараҡ, хеҙмәтемде ошолай баһалау­ҙарына бик шатмын. Предприятие хеҙмәт­кәрҙә­ренең төп өлөшөн шахтерҙар тәшкил итә. Эштәре бик ауыр һәм хәүефле. Яңы рудник булдырыу ком­бинаттың ғүмерен 30-40 йылға оҙайтты. Халыҡҡа эш урындары күбәйҙе, етеште­реү­сәнлек ике мәртәбә артты. Хәҙер ер аҫтынан 400 тонна мәғдән алабыҙ”, – тип ҡыуанысы менән уртаҡ­лашты ул.