Шөкөр, үҙ ҡаҙанында ғына ҡайнамай хәҙер башҡорт. Элек буй етмәҫлек күренгән Мәскәүҙә башҡаларға дәрес бирә ул. “Викинг” фильмын ҡараһағыҙ, унда һуғыш күренештәренең күп булыуын күргәнһегеҙҙер. Ә бына шундағы төп ролдәрҙе уйнаған билдәле Данила Козловский, Игорь Петренко, Владимир Епифанцевтарҙы ҡылыс тоторға, ҡул һуғышына башҡорт егеттәре өйрәтә!
Ил кинотеатрҙарында шаулап-гөрләп “Викинг” фильмының премьераһы бара. Ул
X быуатта Русь ерендә Рюриктар тоҡо­монан Новгород кенәзе Владимир Свято­сла­вичтың власҡа килеүе тураһында. Кино­ла Данила Козловский, Светлана Ходченкова һәм башҡа билдәле Рәсәй актерҙары төшкән.
Ә башҡорттарҙың был тарихи фильмға ниндәй ҡыҫылышы бар? Эш шунда: “Викинг”ты беҙҙең яҡташта­рыбыҙ ҙа төшө­рөшкән. Бына уларҙың исемдәре – Айҙар Закиров, Роберт Йылҡы­баев, Рөстәм Миңлебаев, Әс­хәт Нәҡиев, Зөлфәр Әх­мәтов. Ҡайһы бер күмәк күренештәрҙә үҙҙәре лә ҡатнашҡан. Хатта бер нисә ролде уйнағандар. Мәҫәлән, Ейәнсура районының Абҙан ауылынан Роберт Йыл­ҡыбаев бер үҙе дүрт персонажды һын­ландырған.
– Минең төп эшем – уҡы­тыусылыҡ. Унан ғына – ак­тер­лыҡ, – ти Роберт. Ысын­лап та, киноны төшө­рөү баш­ланмаҫ элек үк ул Данила Козловский, Игорь Петренко, Владимир Епифанцев, Максим Суханов, Александра Бортичты ҡы­лыс менән һуғышыу алымдарына өйрәтә. Аҙаҡ­тан фильмда үҙе улар менән алыша.
Роберт Йылҡыбаев За­һир Исмәғилев исемендәге Өфө сәнғәт институтында театр һәм кино актеры белгеслегенә уҡый. Шул уҡ уҡыу йортонда һәм Милли йәштәр театрында эшләй. Мәскәүгә китеп, ГИТИС-та аспирантура тамамлағас, сәхнә плас­тикаһы кафед­раһында эшкә ҡала. Ул ВГИК-та ла йәш актерҙарға шуның буйынса дәрестәр бирә.
Башҡортостан егете ошоға тиклем 40-тан ашыу фильмда трюктар ҡуйыуҙа һәм фехтование күренеш­тәрен ойоштороуҙа ҡат­нашҡан. Уның ҡатнашы булған иң билдәле сәнғәт өлгөләре – “Екатерина II”, “Трюкач”, “Айҙың кире яғы-2”, “Казанованың ҡатын-ҡыҙы”, “Умартасы”, “Палач”, “Ҡылыс-2”. Яҡташыбыҙ – Рәсәй каскадерҙары ассо­циацияһы ағзаһы.
Шуныһы ҡыҙыҡ: Роберт Яңы йыл байрамына тыуған ауылына ялға ҡайтҡас, әлегә “Викинг”ты тулыһынса ҡарай алмаған. “Яҡын-тирәлә кино­театрҙар юҡ шул”, – тип әйтеп ҡуйҙы ул.