Ошо көндәрҙә республикабыҙҙың мәҙәни-ижтимағи тормошонда күптән көтөлгән шатлыҡлы ваҡиға булды: башҡорт телендә Башҡорт энциклопедияһының
4-се томы баҫылып сыҡты. Баҫмаға “м”, “н”, “о”, “ө” хәрефтәренә башланған 2100-ҙән ашыу мәҡәлә ингән, шуларҙың 748-е – биографик характерҙағы яҙма. Был ҙур күләмле, киң диапазонлы хеҙмәттә республикабыҙҙың мәҙәни-ижтимағи, сәйәси тормошондағы ваҡиғалар, фән, мәҙәниәт, мәғариф, спорт, ауыл хужалығы, тарих һәм башҡалар тураһында бай мәғлүмәт бирелә.


Рус телендәге варианты менән сағыштырып ҡарағанда, был томдағы мәҡәләләргә өҫ­тәмә мәғлүмәттәр индерелгән, баҫ­мала Башҡортостандың ижтимағи-сәйәси тормошонда, иҡти­садта һәм мәҙәниәттә булған үҙгәрештәр сағылыш тапҡан. Дүртенсе томдағы мәҡәләләр республиканың тарихын, географик-территориаль сиктәрен, үҫемлек һәм хай­уандар донъяһын, ҡала һәм ауылдар тарихын, республика халыҡ­тарының иҡтисад, фән­ни-техник, мәға­риф өлкәһендә өлгәшкән төп ҡаҙа­ныштарын яҡтырта. Баҫмала урын алған мәҡәләләрҙең күпселеге республика тарихында сағыу эҙ ҡалдырған күренекле шәхес­тәргә арналған. Китапта рес­публикабыҙҙың күп кенә ауылдары һәм тораҡ пункттары тураһында әлегә матбуғат бит­тәрендә баҫылмаған мәғлүмәт бирелде (2010 йылға ҡарата), уларҙың башҡортса атамалары тикшерелеп яҙылды. Республиканың физик-географик, административ-территориаль бүленеше һәм территориаль карталары тәүге тапҡыр башҡорт телендә тәҡдим ителде.
Энциклопедия урыҫ телендә нәшер ителгән ете томлыҡ баҫмаға нигеҙләнеп эшләнде. Әммә ул туранан-тура тәржемә түгел, баҫмала урын алған мәҡәләләр өҫтәмә мәғлүмәттәр менән тулыландырылды, сит өлкәләрҙәге башҡорттар күп­ләп йәшәгән райондар, ауылдар индерелде, сайтҡа электрон вариант ҡуйылғандан һуң нәшриәткә килгән бик күп тәҡ­димдәр һәм кәңәштәр иҫәпкә алынды, был үҙ сиратында баҫманы тағы ла байытып ебәрҙе. Баҫма һәр журнал һәм гәзит редакцияһы, уҡыу йорттары өсөн өҫтәл китабы, ғилми белешмә булырлыҡ итеп эшләнгән. Был универсаль энциклопедияны башҡа төрки телдәрҙе белгән кешегә лә төп нөсхәһендә уҡып, фәһемле, эстәлекле мәғлүмәт алырға мөмкин. Ғөмүмән, “Башҡорт энциклопедияһы” – башҡорт телендә донъя күргән ғәжәйеп бай мәғлүмәтле, үҙенсәлекле, киләсәк быуындарға ҙур мираҫ булып ҡалырлыҡ баҫма ул. Шулай уҡ ҡалған томдарҙың электрон варианттары ла нәш­риәттең сайтына ҡуйылды, улар менән һttр:/башкирская энциклопедия.рф сайтында танышырға була. Фекерҙәре­геҙ­ҙе, тәҡдимдәре­геҙҙе көтә­беҙ.
Нәшриәт коллективына, әлеге ҙур хеҙмәтте башҡарыу­ҙа ҡатнашыусы ғалимдарға, белгестәргә, тәржемәсе­ләргә ҙур рәхмәтебеҙҙе белдерәбеҙ. Уларға энциклопедияның яңы томдарын әҙерләүҙә уңыштар теләйбеҙ.