Күптән түгел “Урал” халыҡ сәнғәте галереяһында “йылы” ғына рәсемдәрҙән торған күргәҙмә асылды. Төп урынды портреттар биләй. Авторҙары – Наилә Шәрипова менән Әлфиә Бикбулатова. Икеһе лә
М. Аҡмулла исемендәге Башҡорт дәүләт педагогия университетының графика һәм һынлы сәнғәт факультетын тамамлаған.


Ҡылҡәләм оҫталарын беренсе һәм мәртәбәле күргәҙ­мәләре асылыу уңайынан ҡот­ларға тип университеттың деканы, рәссам Тәлғәт Мәсә­ли­мов менән профессор, рәссам Әмир Мәжитов та килде. Ҡунаҡтар элекке студенттарына үҙҙәренең ғорурланыу­ҙарын һәм һоҡланыуҙарын еткер­һә, шәкерттәре иһә остаздарына рәхмәт әйтеүҙе урынлы тапты.
Матурлыҡта бер нәмә лә артыҡ һәм бер нәмә лә кәм булмаҫҡа тейеш тигән һымаҡ, бында бары­һы ла ихлас һәм урынлы. Эш көнөнән һуң йонсоған күңел ысын мәғәнә­һендә ял итә.
Наилә Ғүмәр ҡыҙы сәнғәт донъя­һында Нелли булараҡ танылған. Хәйер, ижады менән билдәлелек яулаһа ла, үҙен уҡытыусылыҡтан башҡа күҙ алдына килтерә алмай ул. Ни тиһәң дә, университетты та­мам­лағандан һуң яҙмышын мәғариф менән бәйләгән шәхестең бөтә хеҙмәт юлы ошо өлкәлә үтә. Башта Балалар һынлы сәнғәт студияһында уҡытһа, һуңыраҡ дөйөм мәк­тәптә махсус фәндәр буйынса белем бирә башлай. Бөгөн – Өфөнөң технология һәм дизайн колледжы уҡытыусыһы. Төп эшенән башҡа Өфө, Мәскәү, Санкт-Петербург вуздарында архитектура, дизайн йүнәлеше буйынса репети­торлыҡ эшен дә алып бара. Ә рәсем­дәренең йүнәлешенә килгәндә иһә, тәғәйен генә стилгә ҡалып­лашмай, төрлө алымдарҙы ла ҡыйыу ҡуллана.
– Картиналарым – һынлы сәнғәттә белем биреүҙең ниге­ҙе һаналған академик рәсем­дәр алымы, тип тә атар инем. Үҙебеҙҙең студент­тарыбыҙ килгән, уларға ижадыбыҙҙы күреү, берҙән, ҡыҙыҡ булһа, икенсенән, тәрбиәүи йәһәттән өлгө булып тора, – ти ул.
Әйткәндәй, күргәҙмәгә ҡу­йыл­ған ҡурсаҡтар ҙа ҡыҙыҡ­һыныу уята. Милли кейемдәге был ҡуп­шыҡайҙар – Әлфиә Камил ҡыҙы­ның ижад емештәре.
– Ҡурсаҡтар өсөн образды берәй әкиәттән алам, ҡайһы берҙә тормоштан да “күсерер­гә” тура килә. Ә инде “Был донъяла нимә эшләй белә­һегеҙ?” тип һораһағыҙ, бар белгәнем рәсем төшөрөү ҙә ҡурсаҡтар яһау, – тине ул.
Һынлы сәнғәт – ул аң ҡалы­бының иң нескә ҡылдарын тир­бәткән сихри донъя. Күргәҙмә залында урын алған картиналар ҙа кешеләрҙе арбаны, иҫтәрендә мәңге уйылып ҡалырлыҡ мәғәнә өҫтәне... Кешелеккә матурлыҡ өлгөһө таратыусы, һынлы сәнғәт өлкәһендә быуын-быуын яңы шәхестәргә белем биреүсе ябай уҡытыусыларға – Наилә Ғүмәр ҡыҙы менән Әлфиә Камил ҡыҙына рәхмәт. Заман геройҙары өсөн рәхмәт!