Яҡшы китапты туҙан баҫмай.
Ғәбит Садиҡов.

Туған тел

Туған телем – ер-һыуымдың һыны,
Яҡты донъям, һауам, һулышым.
Сал быуаттар, йөҙәр быуын аша
Тыумышымдан килгән булмышым.
Назар Нәжми.

***

Инәм теле – иман телем,
Әгәр һине һағынмаһам,
Көн дә һиңә табынмаһам,
Телдәремдән яҙыр инем.
Мостай Кәрим.

***

Туған тел – ул ата-әсәң теле, донъяла тәү ишеткән һүҙең, асылған телең, рухи моңоң.
Ғайса Хөсәйенов.

***

Татлы телдең төбө шәрбәт, мөләйем.
Аҡмулла.

***

Халҡым теле миңә – хаҡлыҡ теле, –
Унан башҡа минең илем юҡ;
Илен һөймәҫ кенә телен һөймәҫ,
Иле юҡтың ғына теле юҡ!
Рәми Ғарипов.

***

Телдең үлеме – милләттең һәләкәте.
Вадим Сафин.

***

Туған телдән биҙмә!
Сафуан Әлибай.

***

Тел – милләттең тере йәне, йөрәк тибеше.
Рәшит Шәкүр.

***

Теле бөткәндең бит көнө бөтә,
Иле бөтә теле бөткәндең.
Рауил Бикбаев.

***

Тел ауылда ғына һаҡлана, ҡалала бөтә. Ә тел бөткәс, милләт бөтөүгә – бер аҙым.
Әмир Әминев.

***

Һөйгәнемдән айырһаң, айыр әйҙә,
Ҡанатымды ҡайырһаң, ҡайыр әйҙә.
Тик айырма мине тыуған илемдән,
Мәхрүм итә күрмә туған телемдән.
Рамаҙан Шәғәлиев.

***

Ике һүҙҙең береһендә – ят тел һүҙе,
Ҡолағымды ярып бара, бөттө түҙем.
Ҡыйналғанмы, ҡыйланғанмы башҡорт теле?
Кем ғәйепле? Заманаммы? Бәлки, үҙем?..
Ҡәҙим Аралбай.

***

Теше бар – теше менән, теле бар теле менән үткәрә.
Ризаитдин Фәхретдин.

***

Үткән-һүткән хужа булғас һиндә,
Телеңде лә хатта ҡыйырһытҡан.
Әгәр һөйләшмәһәң үҙ телеңдә,
Моңһоу ҡалыуың бар, Башҡортостан.
Яҡуп Ҡолмой.

***

Яҙмышыбыҙ – тел яҙмышы,
Беләм уның хаҡында:
Әгәр телем йәшәй икән,
Йәшәйәсәк халҡым да.
Ирек Кинйәбулатов.

***

Әй халҡымдың хисле телкәйе, тим!
Йырлау ғына түгел иларһың, тип,
Бәғереңә үтеп кем әйтә –
Әйләндереп килтереп тел әйтә –
Илатырлыҡ итеп тел әйтә,
Йырлатырлыҡ итеп тел әйтә.
Гөлнур Яҡупова.

***

Тел – ул халыҡтың мәңге тере тарихы ла. Шул ғәзиз тел уны борон бер бөтөн халыҡ итеп ойошторошҡан, уртаҡ тел, һүҙ таптырған; көнөн, йүнен йүнләшкән; тәжрибәһен, аҡылын, күңелдәгеһен үҙенә туплап, уның күркен күтәрешкән; кемлеген бар донъяға танытҡан, халыҡтар менән аралаштырған.
Ғайса Хөсәйенов.

***

Туған телде белмәй тороп,
Ят телдә булмай эш ҡырып.
Рамаҙан Шәғәлиев.

***
Туған телем булмаһа,
Ҡаныма ыу һарылһын,
Ярһып типкән йөрәгем
Шундуҡ шартлап ярылһын!
Абдулхаҡ Игебаев.