19, 20 ноябрҙә М. Кәрим исемендәге Милли йәштәр театрында яңы премьера көтөлә. Милли драматургиябыҙҙа әүҙем эшләгән үҙенсәлекле яҙыусы Мөҙәрис Багаевтың “Аҡса булһа бер муҡса” музыкаль комедияһы хаҡында һүҙебеҙ. Башҡортостандың атҡаҙанған артисткаһы Гөлшат Ғайсина менән әңгәмәбеҙ – яңы премьера хаҡында.
– Гөлшат, һине яңы ижади миҙ­гел менән ҡотлайым. Уны бик ҡыҙыҡлы башлап ебәр­ҙе­геҙ. Баш­ҡорт труппаһы Учалы, Әбйәлил, Күгәрсен яҡтарына барып ҡайтты, Ҡазанды ла ураны. Ә хәҙер инде дәртләнеп яңы премьераға әҙер­ләнә.
– Ҡотлау өсөн ҙур рәхмәт! Театр артистарының ғүмере ижади миҙгел­дәрҙән тора тип әйтер инем, шуға күрә һәр береһен ашҡынып көтәбеҙ. Ә инде 26-сыһы, ысынлап та, сағыу булыр тип ышанабыҙ. Та­маша­сылары­быҙҙы яңы спектаклдәр, ижади осрашыуҙар менән ҡыуандыр­маҡсыбыҙ.
Әле көндәр буйы йырҙар һәм бейеүҙәр өйрәнәбеҙ, сөнки Мөҙәрис Багаевтың “Аҡса булһа бер муҡса” музыкаль комедияһын тамашасы хөкөмөнә сығарырға әҙерләнәбеҙ. Режиссеры – Башҡортостандың атҡа­ҙан­ған артисы Азат Йыһаншин, ком­позиторы – Ришат Сәғитов, рәс­самы – Альберт Нестеров, хореографы – Сулпан Асҡарова. Кос­тюмдар­ҙы рәссам Альбина Жерлицына менән бергә әҙерлә­неләр. Бик күңелле тамаша бул­маҡсы. Иң мөһиме – барыбыҙ ҙа тере тауыш менән спектакль өсөн махсус булды­рылған милли музыка ҡоралдары оркестрына ҡушылып йырлаясаҡбыҙ. Беҙҙең өсөн был ҡыуаныслы, сөнки башҡарыу кимәле камиллаша. Тамашасыға ла фонограмма түгел, ә ысын моң бүләк итәсәкбеҙ.
– Комедияла иркә, шаян бай ҡыҙы Сөмбөләне башҡараһың, беле­үемсә?
– Сөмбөлә образын Алтынай Хамматова менән бергә сыға­рабыҙ. Минең өсөн был героиняны уйнау ҡыйын түгел, сөнки театрҙа 18 йыл эшләгән дәүеремдә, бәхетемә күрә, төп ролдәрҙе күп башҡарҙым. Улар араһында төрлө героинялар булды – Диләфрүз, Ғилмияза, Агазия, Йәми­ләләр, Лариса... Алтынай ҙа күңелен биреп, бик етди әҙерләнә. Спектакль театрға яңы килгән йәштәр өсөн ҙур ижади баҫҡыс булыр, тип уйлайым, сөнки бығаса уйналмаған образдарҙы сәхнәләштерәсәктәр. Миңә иһә тамаша үҙенең тарихи нигеҙе, халыҡсанлығы менән оҡшай.
– Ролдәрҙе кемдәр башҡары­уын да әйтеп китһәң...
– Спектаклдә башҡорт труппа­һы­ның бар артистары тиерлек ҡатнаша: Башҡортостандың ха­лыҡ артисы Мәғәфүр Усманов, рес­публикабыҙ­ҙың атҡаҙанған артистары Нәғим Нурғәлин, Илсур Хә­биров, йырҙары менән эстрадала ла танылыу яулаған Баш­ҡорт­­остандың атҡаҙанған ар­тис­тары Венер Камалов, Гүзәл Әйү­пова, Илнур Лоҡманов, баш­ҡорт труп­паһының төп көстәре Рәмзил Сәлмәнов, Радмир Абдуллин, Шәһит Хамматов, Гөлбинә Сафуанова, Зөлфәр Әхмәтов, Салауат Юлдашбаев, Илгиз Таһи­ров, йәш актерҙар Алтынай Хамматова, Илнур Сәлим­гәрәев, Ләйсән Лоҡманова, Гөлнара Сабитова.
– Гөлшат, был миҙгел яңы матур ролдәр, үҙеңдең яңы концерт программаң менән дә тамашасы иҫендә ҡалһын тип теләйек!
– Ҙур рәхмәт. Барыһын да премьерала көтөп ҡалабыҙ! Киле­геҙ, үкенмәҫһегеҙ!