“Әҙәби нағыш” республика марафоны сиктәрендә М. Кәрим исемендәге Милли йәштәр театрында башлап яҙыусыларҙың шиғыр кисәһе ойошторола тигәс, төбәктәрҙә үткән осрашыуҙарҙы күҙ алдына баҫтырҙым. Ысынлап та, ҡыҙыҡлы ижад иткән, ватансылыҡ тойғоһо менән янған йәштәребеҙ бар бит. Башҡортостан Яҙыусылар союзы менән “Аҡ тирмә” милли-мәҙәни ойошмаһы үткәргән был сараға республикабыҙ райондарынан тиҫтәгә яҡын башлап яҙыусы йыйылды.
Байрамға мәртәбә өҫтәп, зама­ны­быҙҙың мәшһүр ҡурай­сыһы, халыҡ артисы Азат Айытҡолов ҡурайҙа уйнап ебәрҙе. Шулай, моң төйәге Башҡортостанда бөгөн дә – XXI быуатта — шиғыр уҡыйҙар, шиғыр яҙалар. Башҡорт һәм татар телендә ижад итеүселәрҙең ҡоро­на Күгәрсендән Хәким Алсынбаев, Дәүләкәндән Гөлүзә Әхмәҙиева, Ҡариҙелдән Фидаил Сафин, Стәрлета­маҡтан Илүзә Исмәғиле­ва, Белореттан Фәйрүзә Кинйәбае­ва, Әбйәлилдән Нуриҙә Илһамова, Учалынан Денис Ғилманов, Бла­говарҙан Нурлан Ғәниев килгәйне. Улар сәхнәнән тамашасыларға шиғри сәләмен еткерҙе. З. Исмәғи­лев исемендәге Өфө дәүләт сәнғәт академияһының III курс студенттары ла башлап яҙыусыларҙың әҫәрҙәрен уҡып ишеттерҙе. Йәш­тәрҙе тәбрикләп, Башҡортостан­дың халыҡ шағиры Рауил Бикбаев ҡотлау һүҙен әйтте, китаптарын бүләк итте. Башҡортостандың Дәү­ләт Йыйылышы — Ҡоролтай депутаты, шағирә Йомабикә Ильясова ла йәш быуын өсөн ихлас ҡы­уаныуын билдәләне, ижади ҡомар теләне.
“Аҡ тирмә” милли-мәҙәни ойош­ма­һы етәксеһе Рәйсә Күзбәкова, шағирә Тамара Искәндәриә йәш­тәр­гә ҡарата тәбрикләү һүҙен еткер­ҙе. Шағирәләр Зөлфиә Ханнанова менән Гөлнара Хәлфет­ди­нованың сығышын тамашасылар бик йылы ҡабул итте. “Сә­хипъямал” татар ҡатын-ҡыҙҙары йәмғи­әте етәксеһе Ләйсән Сираева, тамашала ҡатнашыусы­ларҙы ҡотлап, матур бүләк, сәскәләр ҙә тапшырҙы.
Шиғыр, йыр, бейеү менән үре­леп барған кисә танһыҡ ҡына осрашыу булып хәтерҙә ҡалды. Улай ғына ла түгел, хатта шиғыр ауазы етмәй ҡалған кеүек булды. Йәш кенә булыуына ҡарамаҫтан, байрамдың режиссеры Эвелина Редькина уны ыҡсым, йылы һәм яҡты мотивҡа ҡора белгән. Алып барыусылар Альбина Фәйзуллина менән Данил Ғофранов та, әйтерһең, ғүмер буйы сәхнәнән төшмәгән оҫталар кеүек иркен һәм профессионалдарса тотто үҙен!
Сарала Архангел районынан Раушан Хажиәхмәтов менән Белореттан Венер Сәлихов та ҡатна­шыр­­ға тейеш ине. Әллә юл боҙолоп китеү ҡамасауланымы, әллә башҡа сәбәптәнме, уларҙан сәләм булманы. Төбәктәрҙә ижад иткәндәрҙе күрмәйҙәр, унда осра­шыуҙарға килмәйҙәр, тип зарла­ныусыларҙың тауышы ишетелеп ҡала ҡайһы саҡ. Нисек инде күрмәйҙәр, нисек инде яҙыусылар осрашыуҙарға йөрөмәй? Башҡорт­остандың халыҡ шағиры Рауил Бикбаев әйтмешләй, быуындар бәйләнеше тигән бөйөк төшөнсә беҙҙә һаҡланған һәм ысын яҙыусы үксәләргә баҫып килгәндәрҙең һүҙенә, ижади аҙымына битараф түгел. Эш һеҙҙә хәҙер, йәштәр, йәгеҙ, ниндәй әҫәрҙәр менән ҡыуандырмаҡсыһығыҙ?!