Былтыр беренсе тапҡыр үткәрелгән халыҡ-ара “Көмөш Аҡбуҙат” милли һәм этник кино фестивале тураһында Рәсәйҙә генә түгел, донъя кимәлендә ишеттеләр. Быйыл фестивалдә ҡатнашыусылар һаны ла бермә-бер артҡан, конкурсҡа ебәрелгән кинолар ҙа сағыуыраҡ, тип билдәләй белгестәр.
“Көмөш Аҡбуҙат” милли һәм этник кино фестивале үҙе­нең географияһы, маҡсаты менән башҡаларҙан айырылып тора. Был хаҡта “Башинформ” мәғлүмәт агент­лы­ғын­да үткән матбуғат конференция­һында “Башҡорт­ос­тан” кино­студияһы директоры Азамат Хужәх­мәтов һөйләне.
– Сараға 250-нән ашыу фильм тәҡдим ителде. Шулар араһынан өс йүнәлеш буйынса 36-һы конкурсҡа һай­лап алынды. Гран-при яу­лау­сы “Көмөш Аҡбуҙат” ме­нән бүләкләнәсәк. Башҡортос­тандан конкурста биш фильм ҡатнашасаҡ: Таңсулпан Бу­раҡаеваның “Ике күрше”һе, Руслан Юлтаевтың “Өс хат”ы, Айнур Асҡаровтың “Әсә”һе, Вилүрә Иҫәндәүләтованың “Тәү­бә”һе, Айсыуаҡ Йомағо­лов­тың “Бибигөл һәм Сәйфел­мөлөг”ө. Бынан тыш, ШОС һәм БРИКС илдәре киноһы көндәре буласаҡ, – тип эш барышы менән таныштырҙы Азамат Шәриф улы.
Шулай итеп, “Көмөш Аҡ­бу­ҙат” кино фестивалендә Азербайжан, Ҡаҙағстан, Ҡыр­ғыҙ­стан, Латвия, Беларусь, Болгария, Куба, Иран, Мысыр, Бангладеш, Ираҡ, Гер­мания, Бөйөк Британия илдәренән, Рә­сәйҙең Баш­ҡорт­остан, Бүрәт, Татарстан, Саха (Яҡут), Удмурт республикаларынан, Хабаровск, Сверд­ловск, Новосибирск өл­кә­ләренән, Мәс­кәүҙән, Санкт-Петербургтан фильм­дар ҡат­наша. Баш ҡала хал­ҡы, ҡу­наҡтар сәнғәт әҫәр­ҙәрен 10 – 12 декабрҙә “Родина” кино­теат­рында, Ак­тер­ҙар йортон­да бушлай ҡарай ала. Фес­тивал­де асыу һәм ябыу тантанала­ры баш ҡаланың “Кон­гресс-хол”ында үтәсәк.