Былтыр ҙа ошондайыраҡ фекер әйткәйнем шикелле “Юлдаш йыры” конкурсы хаҡында: унда төбәк таланттары ҡатнаша һәм һирәк ишетелгән халыҡ көйҙәре, халыҡ йырына әйләнгән композитор әҫәрҙәре яңғырай. Был юлы ла тап шулай булды.


Шәп проект! Тап ошон­да бала саҡта ишеткән моңдарҙың ауазын тойом­лай­һың, һуғым аш­та­рын­да, ҡаҙ өмәләрендә, һа­бан­туйҙарҙа йырланған көй­ҙәр шундай яҡын кү­ңелгә!
Тотош концертты күҙ уңынан үткәрҙем дә үҙем өсөн Ринат Тулыбаев, Фәр­үәз Камалетдинов, Римза Байсурина һәм Әхмәт Мөхәмәтйәновтың сығыштарын билдәләп ҡуйҙым. Ни өсөнмө? Был һис кенә лә объектив­лыҡҡа дәғүә иткән фекер түгел, зауыҡ менән бәхәс­ләшеп булмай. Ет­мә­һә, ана ниндәй абруйлы баһа­лама ағза­лары күҙәтте сы­ғыш­тарҙы.
Ринат Тулыбаев, сөнки халыҡ йырына әйләнгән был әҫәрҙе киң күкрәгенә һалып, бик оҫта баш­ҡарҙы эшҡыуар ағай! Хатта кү­ңел­гә ятты. Юҡҡа ғына уға 1-се урын бирмәгәндәр, күрәһең. Фәр­үәз Камалет­ди­новтың моңо үҙенсә­лек­ле, шулай уҡ йыр ярат­ҡандар араһында бик популяр булған әҫәрҙе башҡарҙы ул. “Йырға тоғ­ролоҡ” номинация­һында еңде егет! Римза Байсурина “Аҡсарлаҡлы күл” менән йөрәккә үтеп инде: был шәхси кисерештәр ша­ғирә Зарема Әх­мәтйә­нова­ның яҙмышын уй­лау, ошо йырҙы тап үҙе баш­ҡарыуын хәтерләүҙән ки­лә. Әйткәндәй, ул “Асыш һәм ихтирам” номина­ция­һын­да бил­дә­ләнде.
Яҡташым өсөн бик ҡы­уан­дым! Афарин, Әхмәт Мөхәмәтйә­нов (һүрәттә)! Һай, Дәү­лә­кән егете! “Соҡан ба­тыр”ҙың кемлеген халыҡ ара­һынан һорашып белешеп ҡуй­һаҡ, тағы ла мәғ­лү­мәтле бу­лыр­быҙ. Ҡо­ба­йыр стилендәге был йыр дәртле маршты ла, сәсән әйтешен дә хәтер­ләт­те. Ул “Өмөт” номина­ция­һында еңеүгә лайыҡ булды.
“Бәйләнештә” социаль селтә­рендә ха­лыҡ­сан йыр­ҙар ижад итеүе менән по­пу­ляр­лыҡ яула­ған Свет­ла­на Сө­ләй­мәно­ваны “Йондоҙло миҙгел” номи­нация­һында тәбрикләне­ләр. Та­ғы ла “Тыу­ған яҡ йырсыһы”, “Илһөйәр­лек ру­хы” номинацияларында еңеүгә лайыҡ булыу­сылар билдәләнде. Бөтә бүләк­ләнеү­се­ләр хаҡында мәғ­лү­мәт “Юлдаш” ра­дио­һының сайтында бар, рәхим итеп ҡарағыҙ!
Гран-при менән Күгәр­сен ра­йо­нынан Эльвир Иш­килдин бү­ләкләнде. Ул бер үҙе оҙон көйгә халыҡ йырын башҡарҙы. “Та­маша­сы һөйөүе”н тауыш би­реү юлы менән билдә­лә­неләр. Кем­дең ту­ған­да­ры, райондаштары күпләп килгән, шул еңгән­дер ти­гән һығымта тыуҙы. Залда кө­йөр­гәҙеләр бик күп ине, Рау­ша­ния Сын­булатова бил­дәле йырсы Рөстәм Ғиз­зәтуллин ижад иткән дәрт­ле йырҙы оҫта баш­ҡар­ҙы, уны сәскәгә күмде­ләр. Алып барыусылар Баш­ҡортостандың халыҡ арти­сы Әхәт Мортазин менән Миләү­шә Ғәлиева был юлы ла тел маһир­лығы менән һоҡландырҙы. Миләү­шәнең милли кейеме сәхнәнең бер биҙәге булды.
“Ҡатнашыусы” дипломына Си­ләбенән Миңһы­лыу Тойғо­но­ва, Йылайыр районынан Фәрит Амантаев, Яңауыл ҡалаһынан Хәлисә Нәсибуллина, Миә­кә районынан Марсель Йосопов һәм Мәсетленән Илүзә Әхмәт­йәнова лайыҡ булды. Быныһына ла хуп тип әйтәйек!