Халыҡ араһында йылдан-йыл киңерәк танылыу ала барған “Википедия” интернет энциклопедияһын тағы ла киңерәк даирәлә таратыу һәм уның йөкмәткеһен артабан байытыу маҡсатында төрлө саралар йыш үткәрелә.

Мәҫәлән, Ҡытай, Һиндостан, Ин­до­незия, Филиппин, Тайвань, Таиланд, Япония һәм Үзбәкстан ирек­мәндәре тәҡдиме менән 1 ноябр­ҙән “Wikipedia Asian Month” халыҡ-ара викимарафоны ойошторола. Ай буйы барасаҡ был бәйге Азияға ар­нап яңы мәҡәләләр яҙыуҙы һәм бул­ғандарын тулыландырып, ка­мил­лаштырыуҙы күҙ уңында тота. Донъяның өс тиҫтәгә яҡын илендәге ирекмәндәр менән бергә был башланғысҡа Башҡорт википедияһы мөхәррирҙәре лә әүҙем ҡушыла.
Виртуаль энциклопедияның туған те­ле­беҙҙәге бүлегендә ҡатна­шыусы­лар ошо­ға оҡшаш халыҡ-ара сара­ларҙа даи­ми ҡатнашып килә. Тәүге тапҡыр улар 2012 йылда Алматы ҡалаһындағы төрки телле википедиялар конференцияһында Башҡорт ви­кипедияһының үҙенсәлекле исем туйын үткәргәйне. Быйыл башҡорт ирекмәндәре үҙҙәренең 10 йыллығы ай­ҡанлы Өфөлә Вики-һабантуй ойошторҙо. Ҡатнашыусыларҙың күп­селеге феке­рен­сә, был йыйын бик матур уҙҙы. Сентябрҙә Башҡорт википедияһы вәкилдәре Үҙәк һәм Көнсығыш Европа илдәре ирек­мән­дәренең Эстониялағы осрашыуында ла ҡатнашты һәм һөнәрҙәштәрен үҙ эштәре менән таныштырҙы.
— Башҡорт википедиясылары халыҡ-ара бәйгеләрҙә ҡатнашыу һәм конкурс шарттарына ярашлы мәҡә­ләләр яҙыу буйынса ярайһы уҡ бай тәжрибә туплаған, — тине Башҡорт википедияһы етәксеһе Рөстәм Нурыев. – Мәҫәлән, виртуаль энцик­лопедиябыҙҙың 10 йыллығына ар­нап былтыр ноябрҙән апрелгәсә үҙе­беҙ­ҙең бәйгене ойошторғайныҡ. Унда би­хи­сап мөхәрриребеҙ ҡат­нашты һәм 764 яңы мәҡәлә яҙҙы. Һуңыраҡ “Викимедиа РУ” һәм “Беҙҙең килә­сәк” социаль программалар фонды ойошторған конкурс барышында Башҡорт википедияһы социаль эшҡыуарлыҡҡа бағышланған 221 яңы мәҡәлә менән тулыланды.
Ирекмәндәрҙең халыҡ-ара бәйге­ләр­ҙең киңерәгендә һәм мөһи­мерә­гендә ҡатнашыуы Башҡортостанды донъя ки­мә­лендә танытыуға һиҙе­лерлек өлөш индерәсәк, тип иҫәпләй ирекмәндәр. Был сара тағы ла һө­ҙөм­тәлерәк булһын өсөн унда ҡатна­шыу­сыларҙың тағы ла күберәк булыуы шарт. Шуға ла википедиясылар туған телде һәм респуб­лика­быҙҙы ихлас һөйөүселәрҙе Азияға арнап кәмендә биш мәҡәлә яҙырға саҡыра. Әүҙемерәк була­йыҡ, милләттәштәр!