Благовещен районында “Әҙәби нағыш” марафонының төбәк этабы үтте. Байрам сараларында яҙыусы, “Ағиҙел” журналының баш мөхәррире Әмир Әминев, шағир, бард, тәржемәсе Сергей Янаки, яҙыусы, “Бельские просторы” журналының яуаплы секретары Салауат Вахитов, шағир, тәржемәсе Владимир Денисов, “Истоки” гәзитенең баш мөхәррир урынбаҫары Василий Коровкин, шул уҡ баҫма хәбәрсеһе Александр Барановский, Ә. Вәлиди исемендәге Милли китапхананың бүлек мөдире Инна Соколова һәм башҡалар ҡатнашты.
Марафонсыларҙы үҙәк китапханала район хакимиәтенең мәҙәниәт, спорт һәм йәштәр сәйәсәте бүлеге мөдире Николай Осинский, биләмә-ара үҙәк китапхана директоры Людмила Хван, китапхана мөдире Әлми­ра Миһранова ихлас ҡаршы алды. Бында Әҙәбиәт йылына, Бөйөк Еңеүҙең 70 йыллығына арналған күргәҙмәләр менән таныштылар. Әҙиптәр автограф ҡалдырҙы, фотоға төштө.
Мәҙәниәт усағына Благовещен районы һәм ҡалаһынан уҡы­тыусылар, китапханасылар, мәҙәниәт хеҙмәткәрҙәре, журналистар, әҙәбиәт һөйөүсе­ләр йыйылғайны. Өфө ҡунаҡ­та­ры һәм уларҙың ҡат­наш­лы­ғында “Әҙәби бәйлә­нештәр” тип аталған “түңәрәк өҫтәл” үтте. Уны асҡанда Благовещен районы хакимиәте башлығының социаль мәсьә­лә­ләр буйынса урынбаҫары Илшат Дәүләтйәнов әҙәбиәт­тең йәмғиәттә мөһим әһәмиәткә эйә булыуын билдәләне.
“Түңәрәк өҫтәл”дә хәҙерге әҙәби әҫәрҙәрҙең сифаты һәм художество кимәле түбән булыуы, йәштәрҙең китап уҡыма­уы, яҙыусыларҙың йәмғиәттәге статусы, мәктәптә әҙәбиәт дә­естәре, китап сығарыу кеүек проблемалар тураһында фе­кер алышыу булды. Йәнле һәм фәһемле һөйләшеүҙә әҙиптәр ҙә, китапханасылар ҙа, уҡы­тыу­сылар ҙа әүҙем ҡатнашты, теге йәки был мәсьәләгә үҙ ҡараштарын еткерҙе. Әңгәмә аҙағында унда ҡатнашыусылар яҡшы әҙәбиәтте һәм китап уҡыуҙы әүҙемләштерергә, по­пулярлаштырырға, был йүнә­леш­тә эшләгән ойошмаларҙың һәм учреждениеларҙың эшмә­кәрлеген киңерәк йәйелдерер­гә һәм берләш­терергә кәрәк тигән һығымтаға килде. Шунда уҡ Благовещен үҙәк район китапханаһының хеҙмәтләнде­реү бүлеге мөдире Ирина Соловьева “Илһам – Вдох­новение” шиғриәт һөйөү­селәр клу­бының эшмәкәрлеге менән таныштырҙы, баҫ­тырылған китаптарын күр­һәт­те. Был ойош­ма 2002 йылдан алып эшләй, бөгөн унда 20-нән ашыу кеше ағза булып тора.
Артабан төбәктәге йәш ижадсылар Асҡар Усманов, Алина Насретдинова, Владлена Солтанова, Яна Мосунова, Антон Антипин һәм Сергей Батуриндың ҡулъяҙ­малары тикшерелде. Әҙиптәр айырыуса Асҡар Усмановтың яҙмаларын ыңғай баһаланы, йәштәрҙең һәр береһенә яҡты теләктәрен еткерҙе.
Сара мәҙәниәт һарайында дауам итте. Марафондың символы – Йылъяҙма-китапты Бла­говещен районы хакимиәте башлығының социаль мәсьә­лә­ләр буйынса урынбаҫары Ил­шат Дәүләтйәнов Илеш ра­йо­ны хакимиәте башлығының социаль мәсьәләләр буйынса урын­баҫары Рубин Ғәлимовҡа тап­шырҙы. Тамашасылар алдында Әмир Әминев һәм Сергей Янаки сығыш яһаны. Ҡала мәҙәниәт һарайының “Отражение” театр студияһында шө­ғөл­ләнгән балалар “Ҡыш бул­мая­саҡ” (В. Ольшанский пьесаһы буйынса) спектаклен ҡуйҙы. Унда йәмғиәтебеҙҙәге киҫкен проб­лемалар яҡтыртылды.