Байрам алдынан республикабыҙҙа билдәле ижадсыларҙы бүләкләү күркәм йолаға әүерелде. Был юлы ла Хөкүмәт йортонда үҙ хеҙмәте менән йәмәғәтселеккә файҙа килтергән ҡәләм әһелдәрен, сәнғәт оҫталарын тәбрикләнеләр.
Тантананы асып, Башҡорт­остан Хөкүмәте Премьер-министры урынбаҫары Салауат Сәғитов бүләкләнеүселәрҙе ҡотланы.
– Бөгөн был залда тәүге тапҡыр халҡы­быҙ­ҙың ике оло шәхесе Шәһит Хоҙайбирҙин менән Шәйехзада Бабич исе­мендәге пре­миялар тапшырыла, – тине ул. – Уларҙы иле­нә-еренә мөхәббәт тойғоһо берләштерә. Ошо бүләккә тап уларҙың рухы һеңгән ижад­сы­ларҙың лайыҡ булыуы мәртәбәле. Был пре­миялар һеҙҙе артабан да республика мән­фәғәтенә емешле хеҙмәт итергә дәртлән­дер­һен.
Быйыл Шәһит Хоҙайбирҙин исемендәге премияға – 21, ә Шәйехзада Бабич исе­мен­дәге премияға 27 кеше дәғүә итте, шуға ла иң лайыҡлыларҙы һайлау еңел бирелмәне.
Матбуғат өлкәһендәге уңыш­тары өсөн Шә­һит Хоҙайбирҙин исемендәге Хөкүмәт пре­мия­һына “Труд” гәзитенең бүлек мөхәррире Гүзәл Агишева, “Урал” гәзитенең хәбәрсеһе (Белорет районы) Рәмилә Мусина, “Авыл тормышы” гәзитенең (Стәрлетамаҡ) фото­хәбәр­сеһе Юрий Нестеренко лайыҡ булды.
Ә инде әҙәбиәт, сәнғәт һәм архитектура өлкә­һендәге ҡаҙаныш­тары өсөн Шәйехзада Бабич исемендәге дәүләт йәштәр премияһы яҙыусы һәм журналист Айгиз Баймөхә­мә­товҡа, Мәскәү филармонияһы артисы Артур Нәзиуллинға, рәссамдар Айгөл Ишбирҙина менән Вера Фроловаға тапшырылды.
Хеҙмәттәшебеҙ Айгиз Ғиззәт улы “Ҡал­дыр­ма, әсәй!”, “Не оставляй, мама!” тигән китаптары өсөн эйә булды мәртәбәле бүләккә. Салауат Тәлғәт улы, уны ҡотлап:
– Һеҙ 26 йәштә генә ошондай уңышҡа өл­гәш­тегеҙ. Уның Әҙәбиәт йылына тап килеүе айырыуса ҡыуаныслы. Башҡорт әҙәбиәте бай, һәм уның күркәм традициялары бар. Оло әҙип­тәрҙән үрнәк алып, киләсәктә әҙәбиәте­беҙҙе яңы биҙәктәр менән байытырһығыҙ тип ышанам, – тине.
– Мин дәүләт бүләге алыр өсөн күп һәм яҡшы яҙырға тырышманым. Ә премия миңә күп һәм яҡшы яҙырға яуаплылыҡ өҫтәйәсәк, – тип яуапланы Айгиз Ғиззәт улы.