Бар хәстәрем, бар хәсрәтем –
Бала өсөн.
Хеҙмәтем дә, хөрмәтем дә –
Бала өсөн.
Үкенеүҙәр, үтенеүҙәр –
Бала өсөн.
Йоҡоһоҙ төн, тынғыһыҙ көн –
Бала өсөн.
Утҡа, һыуға уҡталыуым –
Бала өсөн.
Сығыр юлдан туҡталыуым –
Бала өсөн.
Таңдан әүәл ҡайнар аш та –
Бала өсөн.
Тәгәрәгән ҡайнар йәш тә –
Бала өсөн.
Төндәр тыуһа, көндәр көтәм
Бала өсөн.
Күңелемдә йырҙар йөрөтәм
Бала өсөн.
Иртә-кисен йөрәк хисем –
Бала өсөн,
Барлыҡ эшем, барлыҡ көсөм –
Бала өсөн.
Янам-түҙәм, көйәм-һүнәм
Бала өсөн.
Ғорур башты түбән эйәм
Бала өсөн!

Бик күптәр белә, был шиғырҙың авторы – өлкән быуын шағирәһе Фәниә Чанышева. Ул – минең өләсәйҙәремдең тиҫ­тере, шуға ихтирамым икеләтә арт­ҡандай. Улар бит аслыҡты, һуғыш йылдарын кисергән быуын.
Яңыраҡ Фәниә апай “Еллар аша, юл­лар аша” тип аталған китабын ҡу­лы­на алып ҡыуанған. Тиражы ҙур булмаһа ла, Әҙәбиәт йылында әҙибә был баҫма менән үҙенә генә түгел, барлыҡ шиғриәт һөйөүселәргә, уның ижады менән ҡы­ҙыҡ­һыныусыларға ҙур бүләк эшләгән. Өс телдә нәшер ителгән йыйынтыҡта шағирәнең ижады хаҡында яҙылған мә­ҡәләләр, уның менән әңгәмәләр, хәти­рә­ләр, шиғырҙары тупланған. Яҙма­ларҙың авторҙары – беҙҙең замандаш яҙыусы­ларыбыҙ Ғайса Хөсәйенов, Абдулхаҡ Игебаев, Ирек Кинйәбулатов, Әнисә Та­һирова, Мөкәрәмә Садиҡова, Зөһрә Ҡот­ло­гил­дина, Әлфиә Әйүпова, Фәниә Ғә­би­ҙул­лина... Ҡайһы бер мәҡәләне яҙ­ғандар мәңгелеккә күскән инде. Әйтәйек, Яныбай Хамматовтың, Кәтибә Кинйәбу­латованың, Розалина Нуруллинаның яҡ­ты фекерҙәрен бик ҡәҙерләп һаҡлай шағирә. Заманында Фәниә Чанышева үҙе бик күп ҡәләмдәштәре хаҡында мә­ҡәлә яҙған. Йыйынтыҡ әҙибәнең шәхси архивындағы фотолар менән дә байытылған.
“Ниндәй генә жанрҙа, ниндәй яҙма­һын­да ғына булмаһын, Фәниә Чаныше­ва һәр саҡ үҙе, саф һәм ихлас күңелле шәхес һәм әҙибә булып ҡала. Был дуҫ­лыҡ, туғанлыҡ, хеҙмәттәшлеккә мин үҙем дә шаһитмын”, – тип яҙа Ғайса Хө­сәйенов хәтирәләренең береһендә. Йыл­дар, юлдар аша һалынған рухи кү­пер­ҙәрен был баҫма менән тағы ла нығытып ҡуя әҙибә.