Ошо көндәрҙә Мәскәүҙең “Коломенское” дәүләт музей-ҡурсаулығында милли байрамыбыҙ – һабантуй гөрләп үтте. Унда Мәскәү Хөкүмәте етәкселәре, Башҡортостан Республикаһы Хөкүмәте Премьер-министрының беренсе урынбаҫары Рөстәм Мәрҙәнов, Татарстан Республикаһы Дәүләт Советы рәйесе Фәрит Мөхәмәтшин һәм башҡа рәсми вәкилдәр ҡатнашты.
Һабан байрамы Мәскәү халҡы ара­һында киң танылыу ала бара. Быйыл унда 150 мең самаһы кеше күңел асты. Улар башҡорт һәм татар халыҡтарының мәҙәниәте менән танышты, милли аш-һыуын ауыҙ итте, ҡурай, гармун көйөнә бейеп кинәнде. Бигерәк тә иғтибарҙы “Башҡорт ауылы”ндағы ҡортсолоҡ шө­ғөлө йәлеп итте. Байрам ҡунаҡтары баш­ҡорт балын тәмләп ҡарау ғына түгел, ши­фалы “һут”ты нисек алыу серҙәре менән дә ҡыҙыҡһынды. Баш ҡала халҡы шулай уҡ ҡорот ыҫлау, ҡатыҡ, айран эш­ләү кеүек шөғөлдәрҙе мауығып күҙәтте. Балаҫ һуғыу ҡора­малы артына ултырып ҡарарға теләү­селәр ҙә бихисап ине.
“Башҡорт ауылы”ндағы тирмәлә ҡим­мәт­ле музей экспонаттары сараға кил­гәндәр өсөн үҙе бер асыш булғандыр, моғайын. Бында уларҙың һәр береһе хаҡында ентекләп һөйләнеләр, һорау­ҙарға яуап бирҙеләр.
Тел йоторлоҡ милли аштарыбыҙ ҡу­наҡтарҙы өҫтәл янынан ебәрмәй тотто. Берәүҙәр тәмләп ҡарарға, икен­селәр әҙер­ләү серен яҙып алырға тырышты. Әлбиттә, Хәйбулла хужа­бикәләре бе­шер­гән бишбармаҡ, ҡаҙы, тултырма, бауырһаҡ кеүек ризыҡтар янынан тыныс ҡына үтеп булмай шул!
Һабантуйҙың йәме һәм йәне булған милли көрәш, һырғауылға үрмәләү, тоҡ ме­нән һуғышыу һәм башҡа уйындар үҙе­нә күрә бәләкәй “олимпиада”ға әүерелде.
Хәйбулла районының үҙешмәкәр артистары башҡарыуындағы йыр-бейеү­ҙәргә һоҡланмаған кеше булмағандыр. “Ҡош юлы” фольклор ансамбле, “Түң­гәүер” ҡурайсылар, “Шәжәрә” вокаль ансамбле тамашасы йәнен наҙланы.