Танылған музыкант, республикабыҙҙың атҡаҙанған мәҙәниәт хеҙмәткәре, Шәйехзада Бабич исемендәге дәүләт республика йәштәр премияһы лауреаты Миңлеғәфүр Зәйнетдинов ҡумыҙҙы пропагандалау йәһәтенән ғәйәт ҙур эш башҡара. Ул оҫта уйнауы менән Австрия, Норвегия, Германия, Франция, Төркиә, Польша тамашасыларын да хайран ҡалдырған.
Виртуоз ҡумыҙсы яңыраҡ Ҡаҙағстандан ижади сәфәрҙән ҡайтты. Замандашыбыҙ ҡа­ҙаҡ ханлығының 550 йыллығы уңайынан ойош­торолған “Быуаттар өнө” халыҡ-ара фольклор-этнографик фестивалендә ҡатнашҡан икән.
– Мәртәбәле сараға ижадташ дуҫым, ҡаҙаҡ композиторы Эдиль Хөсәйенов саҡырғайны, – ти Миңлеғәфүр Зәйнетдинов. – Беҙ уның ме­нән күптән аралашабыҙ, байтаҡ сәх­нәләрҙә бергә сығыш яһаныҡ. Фестивалдең юғары кимәлдә ойошторолоуы һөйөндөрҙө. Ҡаҙағстанда үҙешмәкәр коллективтарға, фольклорға ҙур иғтибар бүленә. Унда боронғо мәҙәни традициялар ҙа һаҡланған.
Музыкант белдереүенсә, фестивалдә Си­ләбе өлкәһенән, Таулы Алтай Рес­пуб­ли­ка­һынан, шулай уҡ Ҡытай, Монголия, Бе­лоруссия, Ҡаҙағстан илдәренән сәнғәт оҫта­лары ҡатнашҡан. Яҡташыбыҙ иһә ун төрлө музыка ҡоралында уйнап күрһәткән. Тамашасылар уның башҡарыуында “Сал быуаттар ауазы”, “Уралда” кеүек ком­по­зи­ция­ларҙы йылы ҡабул иткән.
Башҡаса булыуы мөмкин дә түгелдер. Оҫта ҡумыҙсы был ижади әҫәрҙәрендә тотош Башҡортостандың гүзәл тәбиғәтен күҙ алдына килтерә. Һы­ҙылып таң атыуы, ҡоштарҙың сутылдашыуы, шишмәнең сылтырап ағыуы, сал даланың еле, ат тояҡтары тауышы – барыһын да башҡорт егете серле ҡумыҙ аша тамашасы йөрәгенә еткерә.
Миңлеғәфүр Зәйнетдиновтың сит тарафтан һәр саҡ еңеү менән ҡайтыуына күптән күнегеп бөткәнбеҙ. Яҡташыбыҙ был юлы ла һынатманы: фестивалдең лауреаты булып, иҫтәлекле думбыра һыны менән бүләкләнде. Тынғыһыҙ замандашыбыҙға яңынан-яңы ижади үрҙәр теләйбеҙ!