Кушнаренко районы – башҡорт әҙәбиәте генә тү­гел, Рәсәй шиғриәте өсөн дә ҙур шағирә биргән тө­бәк. 2008 йылда Мәс­кәүҙә үткән яҙыусылар ҡо­ронда барыһы ла Баш­ҡорт­ос­тандан икән­лекте һәм фамилиям Абдуллина бул­ға­нын белгәс, Лира­ның ҡыҙыһыңмы әл­лә, тип һорашты. Эйе, бе­лә инем рус телендә ижад иткән, һуғыш арҡаһында атайһыҙ, бала сағында уҡ әсәйһеҙ ҡалған, Виктор Ас­тафьев кеүек күренекле Рәсәй яҙыусыһы тәҡдиме менән СССР Яҙыусылар союзына алынған лирик шағирә хаҡында. “А лебедь-то лебедем” шиғырына яҙылған йырҙы Валентина Толкунова йырланы үҙ заманында. Яҙма Интернет селтәрендә бар.
Белгород өлкәһенең Иҫке Оскал ҡа­лаһында яҡты донъя менән хушлашҡан шағирә. Йәшәгән йортонда таҡтаташ элен­гән, урамға исеме бирелгән. Гәзит уҡыу­сы­ларға нескә лириктың бер нисә шиғырын башҡортсаға ауҙарып тәҡдим итәм. Уның хаҡында “ҡатын-ҡыҙҙың күңелен нескә той­ған һәм шиғыр юлдары аша гүзәл зат серен асҡан шағирә” тиҙәр.


* * *
Ҡайғы ауыр, тигәйнеләр –
Һис ышанманым.
Гонаһтарға алыҫ микән –
Уй тышаманым.

Йыраҡ микән Күккә ара –
Ҡараманым шул.
Ямғыр яуыр, әллә ҡармы –
Юраманым шул.

Һөйөклөң менән – ожмах, ти,
Татығаным юҡ.
Үҙең һайла, тиһәләр ҙә,
Ашыҡҡаным юҡ.

Һүрел унан тип әйттеләр,
Үкенмәм микән?
Йөрәгемде йолҡоп биреү
Еңелдән микән?
* * *
Барыһына йәше менән түләй ҡатын,
Ынйыларҙан ҡиммәтерәк уның хаҡы.
Һыҙланыуҙар – әрнеүҙәрҙән,
Хыянаттан.
Ә мин бына илай белмәй торған заттан,
Таш-һын булып ҡатам, тештәремде ҡыҫып.
Һин алмашҡа ниҙәр һорарһың һуң, дуҫым?..

* * *
Бигерәк иҫәр булдым,
Татлы шараптар эстем.
Хушлашҡанда, тилереп,
Күҙ-йәш даръяһы кистем.
Күҙ йәше баһаланмай,
Һағыш шарапта батмай.
Ялҡын утында янмам,
Айға ҡарап уфтанмам.
Миңәме һуң көйөргә?
Миңәме йәш түгергә?
Һин китәһең. Илаһым,
Юҡ минең юғалтаһым.
Лира АБДУЛЛИНА.