Ауыл, мәктәп, ғаилә мөнәсәбәт­тәре, баҙар иҡти­сады, ҡулай­лаш­тырыу проб­лемаларын ябай, халыҡсан тел­дә яҙылған, нескә юмор менән һуға­рыл­ған ҡыҫҡа ғына хикәйә­ләре, юморескалары аша һүрәт­ләгән Фәрит Әбү­бәкеров үҙ уҡыусыларын йәнә һөйөндөрҙө. Күптән түгел парсаларҙан, уймаҡ хикәйәләрҙән торған “Һабаҡ” тигән китабы донъя күрҙе уның.
Оло йәштә булыуына ҡарамаҫтан, Фәрит Хаммат улы ижад утында ҡайнап йәшәй: әленән-әле юморескалары “Һә­нәк” журналында, “Йәшлек”, “Атайсал”, “Һаҡмар” гәзиттәрендә баҫылып тора. 2005 йылда сыҡҡан “Афарин!” исемле китабы әҙәбиәт һөйөүселәрҙең күңелен яулап өлгөргән.
1991 йылда Фәрит Әбүбәкеров Бай­маҡ районының “Октябрь байрағы” гә­зитенең юбилейына ҡарата үткә­релгән юморескалар конкурсында лауреат була. Шунан бирле ныҡлап яҙыша башлай. Әйткәндәй, авторҙың оҫталығы уның бай тормош тәжрибәһенән дә киләлер. 1952 йылда данлыҡлы Темәс педагогия училищеһын тамамлағас, Бөрйән районына эшкә ебәрелә. Бында ул математиканан, шулай уҡ башланғыс кластарҙа уҡыта. 1962 йылда Баймаҡ районының Иҫке Сибай мәктәбенә килә һәм хаҡлы ялға сыҡҡансы шунда эшләй. Ситтән тороп Башҡорт дәүләт уни­верситетының география факультетын тамамлай.
– Минең уҡытмаған дәресем ҡал­маны, – тип йылмая Фәрит Хаммат улы. – Шахмат яратыуымды ла балаларға бирергә тырыштым, уларға уйын сер­ҙәрен өйрәттем.
Тырыш хеҙмәте өсөн остаз “РСФСР-ҙың халыҡ мәғарифы алдынғыһы”, “СССР-ҙың мәғариф алдынғыһы” исем­дәренә лайыҡ булған.
Чеховтың “Йыйнаҡлыҡта – бөйөклөк” тигәне Фәрит Әбүбәке­ровтың ижадына ла хас. Ул үҙенең әйтер һүҙҙәрен, за­манға бәйле төрлө проблемаларҙы бер аҙ кинәйәләп йор һүҙ менән еткерә. “Тәү ҡарашҡа тыныс холоҡло күренгән Фәрит ағай юмор менән һуғарылған хикәйә­ләрҙе нисек яҙа икән?” тип аптырап та ҡуялар. Бының сере – тормошто яра­тыуҙа, юморҙы аңлауҙа, тәнҡитте дөрөҫ ҡабул итеүҙә. Яратҡан шахмат уйы­нындағы кеүек үҙ юлы, үҙ алымы булған юмор оҫтаһының “Һабаҡ” китабы китап һөйөүселәргә ҙур һабаҡ булмаҡсы.