-– Вәт, исмаһам, оҫта!
– Сәхнәне бер итеп бейей бит!
– Ни эшләп Өфө тирәһенә китмәй икән? Баш ҡалала ғына йөрөй торған егет.

Красноусол мәҙәниәт һарайында эшләп йөрө­гән Илшат Хәбибуллин­дың һәр сығышынан әҫәр­ләнгән тамашасы йыш ҡына шулай ти. Икен­се­ләре бығаса Фәйзи Ғәскәров исе­мендәге Башҡорт дәүләт халыҡ бе­йеүҙәре ансамблендә, Стәрлета­маҡта эшләп алған егеттең тыуған яғына ҡайтыуына ҡыуанып бөтә алмай. Бәй, шулай булмайса! Талантлы егет үҙе бейеп кенә ҡалмай, район балаларына ғәжәп талантын ур­таҡлаша. Өйрәтеүсеһе генә бул­һын, улары оторға әҙер тора.
Уңыштар ҙа оҙаҡ көттөрмәне. Хәҙер Илшаттың уҡыусылары төрлө ярыштарҙа ҡат­нашып, еңеү яулай. Былтыр, мәҫәлән, “Байыҡ” телевизион бейеү конкурсында гимназия уҡыусыһы Искәндәр Әбелғужин – Гран-при, ә “Быҙыбыт” бейеү ансамбле III урын алғайны. Ошо конкурстан һуң Искәндәрҙе Рудольф Нуриев исемендәге Башҡорт хореография колледжына уҡырға алалар. Киләһе йылына Илнара Ғөбәйҙул­лина менән Айназ Рафиҡов башҡа­рыуындағы “Эх кенә!” шаян бейеүе I дәрәжә диплом менән баһаланды. Яңы ғына I класты тамамлаған балалар өсөн был тәүге ҙур еңеү була. Уларҙың икеһе лә планшет һәм портфель менән бүләкләнгән. Илшат Хәбибуллинға иһә, “Иң яҡшы етәксе” булараҡ, 5 мең һумлыҡ сертификат тапшырылған.
– Был бейеүҙе Илнара менән Айназ өсөн махсус рәүештә үҙем һалдым. Башҡортос­тандың халыҡ артисы Радмир Бәҙ­ретдинов етәк­селегендәге баһалама ағзалары юғары баһа ҡуйҙы, быға бик шатмын, – ти талантлы егет, тәьҫорат-тары менән уртаҡлашып.
Илшат өлгәшелгәндәр менән генә сикләнеп ҡалырға йыйынмай, килә­һе йыл “Бы­ҙыбыт” ансамбленең гран-при яуларына иҫәп тота. Әле бында 16 бала шөғөлләнә, алмашҡа әҙерлек төркө­мөнә 20 ҡыҙ, малай йөрөй. Килә­сәктә улар “Быҙыбыт”­тың төп көсөн тәшкил итәсәк тә инде.
Илшат Красноусолда тыуа. Бә­лә­кәйҙән мәжлес­тәрҙә өлкәндәрҙең бейеүен кү­реп үҫкән малай мәктәптә ошо сәнғәт нес­кә­лек­тәренә ихлас өйрәнә. Унан Стәрлетамаҡ мәҙәниәт техникумында белем ала, бөгөн Силәбе мәҙәниәт һәм сәнғәт академияһында ситтән тороп уҡый.
Бейеүсе республика, Рәсәй кимә­лендәге ярыштарҙа йыш ҡатнаша, еңеүҙәр яулай. Уның иң ҙур уңышы – 2003 йылда Санкт-Петербург ҡа­лаһында “Талант ҡанаттарында” тигән халыҡ-ара конкурс-фес­ти­валдә I дәрәжәләге лауреат булыуы.
...Мәҙәниәт һарайында сираттағы күнекмә бара. Балалар Илшат ағай­ҙарының һәр хәрәкәтен ентекле күҙәтеп ҡабатлай. Ҡыҙҙарҙың, ма­лай­ҙарҙың йөҙөндәге ихласлыҡ, тырышлыҡ уға сәм, дәрт өҫтәй.