Беҙ юлға сыҡҡанда ҡояштың да кәйефе көр ине. Билдәле әҙип, “Аманат” журналының баш мөхәррир урынбаҫары Дамир Шәрәфетдинов етәкселегендәге төркөмдө Мишкәнең сигендә икмәк-тоҙ менән ҡаршыланылар.

Районға керер алдынан бер ҡапҡа бар, ҡунаҡтарҙы иң башта шуның аша үткә­рәләр. Изге ниәт менән килгән кешеләр үтә был ҡапҡанан. Беҙ ҙә үттек: Башҡортостан Мәҙәниәт министрлығының төп белгес-эксперты Альбина Юлдашбаева, Милли әҙәбиәт музейы директоры Гөлдәр Моратова, Зәки Вәлиди исемендәге Милли китапхана хеҙмәткәре Ирина Күсәрбаева, “Истоки” гәзите редакцияһының яуаплы секретары Светлана Ғафурова, “Мираҫ” бейеү ансамбленең художество етәксеһе Мишкә ҡыҙы Нәфирә Иҡсанова-Бабичева.
Район хакимиәте башлығының социаль мәсьәләләр буйынса урынбаҫары Сергей Александров, мәҙәниәт бүлеге етәксеһе Мөнир Нурисламов, үҙәкләштерелгән китапханалар селтәре директоры Татьяна Кондогина ихлас йөҙ менән әйҙүкләне.
Башта “Дружба” гәзите редакцияһында әҙә­биәт һөйөүселәр менән осрашыу үтте. Юлия Полохина, Рита Ялаева, Светлана Салиева, Светлана Тоймурзина, Геннадий Шамшиев, Вячеслав Камиляновтарҙың ҡулъяҙ­малары тикшерелде.
– Әҙәбиәт йылының тәүге көндәренән үк эш башланыҡ. Дауаханаларҙы әҙәби китаптар ме­нән тәьмин итәбеҙ, кисәләр үткәрәбеҙ, – тине Татьяна Кондогина. – Яңыраҡ Светлана Салиева китабының исем туйын үткәрҙе.
– Йыйынтыҡ ҙур түгел, ләкин миңә шатлыҡ килтерҙе, – ти Светлана. Уның һүҙҙәренә яҙыл­ған йыр кисәнең бер йәменә әйләнде.
– Мин кескәй саҡтан ижад итәм. Тәүге яҙға­ным­ды балалар журналына ебәргәйнем, хат килеп төштө. Телең матур, тормошто, тәбиғәтте тоя­һың, тик шиғырың һуңлап килде, хәҙер көҙ түгел, ҡыш, тигәндәр. Шиғриәттең дә миҙгелдәре бар­мы икән ни!? – тине Геннадий Шамшиев.
Дамир Шәрәфетдинов оҫталыҡ дәресе үткә­реп алды — биш минутта яҙылған шиғырын уҡып ишеттерҙе. Бына ул:
Нисә тапҡыр булдым һиндә –
Йәйҙәрен дә, ҡыш та.
Бабич һәйкәлен асҡан саҡ,
Мишкә һаман иҫтә.

Беҙ ҡайтырбыҙ, тигән, бында –
Ҡайтты Али Карнай.
Тере һымаҡ, ана, таштан
Флорид дуҫым ҡарай.

Сүллек түгел Мишкә ере –
Аҙым һайын табыш.
Бөгөнгөнө күреп торһа,
Әй, ҡыуаныр Бабич!

Күңелемә алып китәм,
Әй, Мишкә, Мишкә!
Өфөләрҙә – баш ҡалала –
Мең төшөрһөң иҫкә.

– Ҡулъяҙмаларҙы уҡып сыҡтыҡ, – тине Дамир. – Тик мари телендәгеләрен алданыраҡ ебә­рергә кәрәк ине, ошо милләт шағирын табып тикшертер инек. Урыҫ теленә тәржемә ител­гән­дәрен генә уҡый алдыҡ юғиһә. “Дружба” гәзи­тен­дә әҙә­би түңәрәк ойошторорға тәҡдим итәм. Әгәр әсәйеңә шиғыр уҡыйһың икән, ул бер ваҡытта ла тәнҡитләмәҫ. Һеҙгә үҙ-ара аралашыу кәрәк.
Светлананың хикәйәләрен уҡығас, мин уға алтмыш йәштәр барҙыр тип уйлағайным. Йәп-йәш ҡыҙ икән. Әгәр үҫергә теләһәң, берәй прозаик менән аралаш. Ә былай яҙғандарың насар түгел.
– Әҙәби әҫәр кешене үҙгәртергә тейеш. – Светлана Ғафурованың был кәңәштәре лә яҙа үтмәгәндер. – Ижад ҡәләм менән ер ҡаҙыуға тиң.
Гөлдәр Моратова ла өгөттәрен бирҙе.
Артабан осрашыу китапханала дауам итте. Башҡорт, урыҫ, татар китаптарының күргәҙмәһе ойошторолған ине. Татьяна Кондогина ра­йон­дың әҙәби һәм мәҙәни тормошо менән таныштырҙы, ауыл ки­тап­ханаларының бигүк шатлыҡлы булмаған хәле тураһында һөйләне.
Гөлдәр Моратова республикала егерме әҙәби музей эшләүе хаҡында әй­теп үтте: “Әҙәбиәт – мәҙә­ниәттең нигеҙе ул. Бында ата-әсәләр ултыра. Ком­пью­терға ҡаҙалған бала­ларҙы нисек китапҡа йәлеп итеү тураһында уйларға кәрәк”.
Китапхананан һуң мәҙә­ниәт һарайына юл­ландыҡ. Бында талантлы драматург Флорид Бүләков иҫтә­ле­генә таҡтаташ асыу тан­та­наһы үтте. Яҡташ яҙыу­­сыны хөрмәт иткән­дәре күре­неп тора мишкәләрҙең. Уның бер туған ҡустыһы Рәүеф ағай ҙа килгәйне. “Райо­ны­быҙҙың бөйөк улына хөрмәт күрһәткәнегеҙ өсөн рәхмәт!” – тине ул.
Бөйөк Бабичтың тыуыуына 120 йыл тулыуға арналған “Талантлы Бабич, ҡанатлы Бабич” тигән кисә башланды. Шағирҙың тормош һәм ижад юлын сағылдырған сәхнәне ҡарап, тәндәр семерҙәне. Артабан Гөлдәр Моратова миш­кәләргә мәҙәниәт министры Әминә Шафи­ҡо­ваның тәбрикләү хатын уҡыны.
Ҡариҙел районы хакимиәте башлығының социаль мәсьәләләр буйынса урынбаҫары Руслан Булатов Йылъяҙма-китапты Мишкә районы хакимиәте башлығының социаль мәсьәләләр буйынса урынбаҫары Сергей Александровҡа тапшырғандан һуң, район мәҙәниәт һарайы артистары күркәм концерт ҡуйҙы.