Уҙған йомала Өфөлә Әҙәбиәт йылы башланыу айҡанлы ҙур байрам булды.

– Әҙәбиәт быуындар араһын бәйләү, йәм­ғиәтте тәрбиәләү, шә­хестәр үҫтереү һә­ләтенә эйә һәм һәр беребеҙҙең тормошонда мөһим урын биләп тора. Рухи байлыҡты, белемде кеше китаптан ала. Бала саҡтан уҡ китап беҙҙе уйланырға өйрәтә, донъяға үҙ ҡарашыбыҙҙы булдыра, рухиәтебеҙҙе камиллаштыра. Был йәһәттән Әҙәбиәт йылы яңы биттәр асыр, мәҙәниәтебеҙҙең үҫешенә тос өлөш индерер, Башҡортостан халҡы яҡшылыҡҡа һәм ижади бейеклеккә өндәгән сифатлы китаптарҙы күберәк уҡыр тигән ышаныста ҡалам, – тине, тантанаға фатиха биреп, баш ҡала хакимиәте башлығы урынбаҫары Сынтимер Баязитов.
Уның артынса Ҡала мәҙәниәт һарайы сәхнәһенә төрлө за­мандың арҙаҡлы әҙиптәрен һынландырған “Пушкин”, “Гоголь”, “Толстой”, “Блок”, “Ахматова” һәм “Аҡмулла” сығып баҫты. Улар әҙәбиәт, әҙәп һәм әхлаҡ хаҡында әңгәмә ҡорғандан һуң “Пушкин”дың: “Башҡортостанда Әҙәбиәт йылы ҡотло булһын!” – тигән ораны яңғы­раны, ә “Толстой” байрамда ҡатнашыу­сыларға Президент В.В. Путиндың Рәсәйҙә Әҙәбиәт йылы айҡанлы тәбрикләү хатын уҡып ишеттерҙе. Артабан В.М. Комаров исемендәге Өфө ҡала балалар ижады һарайының балет бейеү­селәре залға йән өрҙө. “Мираҫ” ансамбле лә “Ҡатыҡ”, “Һалдаттар” бейеүҙәре һәм попурри менән тамашасыларға дәрт өҫтәп торҙо.
Сираттағы сығышында “Аҡмулла” “Баш­ҡорттарым, уҡыу кәрәк!” ши­ғыры менән Әҙәбиәт йылының әһәмиәтен күтәреп ебәрҙе. Әйткән­дәй, олуғ мәғрифәтсебеҙҙең образын Башҡортостандың халыҡ арти­сы Хөрмәтулла Үтәшев һын­ландырҙы. Шулай уҡ халҡыбыҙҙың бөйөк улы Мостай Кә­римдең шиғырҙары менән Башҡорт­остандың атҡаҙанған артисы Марат Ҡорбанғәлиев, халыҡ артистары Ольга Мусина һәм Олег Ханов күңел ҡылдарында уйнаһа, өс быуын әҙиптәре – Башҡорт­остандың халыҡ шағиры, Салауат Юлаев исемендәге дәүләт премияһы лауреаты, филология фәндәре докторы Рауил Бикбаев, Шәйехзада Бабич исемендәге дәүләт йәштәр премияһы лауреаты Лариса Абдуллина һәм йәш ҡәләм тирбәтеүсе Денис Ғилманов – үҙ ижад емештәрен тәҡдим итте. Фәйзи Ғәскәров исемендәге дәүләт академия халыҡ бейеүҙәре ансамбле “Ете ҡыҙ” менән сараны йәмләһә, Диана Ишниязова “Танцкласс” ансамбле менән берлектә “Башҡортостан” йырын башҡарып, халыҡ­ты рух­ландырҙы.
Шул уҡ ваҡытта Ҡала мәҙәниәт һара­йының фойеһында әҙәби ҡо­мартҡылар, яңы китаптар күргәҙ­мәһе барҙы. Унда Зәйнәб Биишева исе­мендәге “Китап”, “Инеш” нәш­риәт­тәре, Әхмәтзәки Вәлиди исе­мендәге Милли китапхана, “Пла­нета” магазиндар селтәре, “Башҡорт энциклопедияһы” ғилми-нәшриәт комплексы үҙ баҫмаларын ҡуйғайны.
Ғөмүмән, Өфөлә Әҙәбиәт йылын асыу тантанаһы үҙенсәлекле һәм юғары ки­мәлдә үтте. Бындай саралар Башҡорт­остандың төрлө ҡала һәм райондарында күп уҙғарыласаҡ әле. Улар әҙәбиәтебеҙ өсөн көнүҙәк мәсьәләләрҙе хәл итеүгә үҙ өлөшөн индермәй ҡалмаҫ, тип ышанғы килә.