Ҡыҙыл алҡа таҡҡан 9-10 йәштәге ҡыҙсыҡтың йырсы эргәһенә сығып башҡалар кеүек бейегеһе, күңел асҡыһы килә, тик атай-әсәй һөйөүе аша бирелгән батырлыҡ, ышаныс тойғоһо булмауы уны сараһыҙҙан борсоулы һәм йәлләткес ҡараш менән тирә-яҡты байҡарға мәжбүр итә... Ярай әле, ошондай хәлдә ҡалған кескәйҙәр янында уларҙы йөрәк йылыһын һалып тәрбиәләгән, ҡурсалаған яратҡан апай-ағайҙары бар. Яңғыҙ балаларға кем тәрбиәселәренән дә ҡәҙерлерәк, яҡыныраҡ һуң был йортта?!


Йырсы Диана Ишниязова тарафынан Шәһит Хоҙайбирҙин исемендәге 1-се республика балалар йортонда ойошто­рол­ған сараның маҡсаты ғаилә наҙынан мәхрүм малай һәм ҡыҙҙар менән ихлас аралашыу, йөрәк йылыһын бүләк итеү, тәмле күстә­нәстәр менән һыйлау ине.
– Мәрхәмәтлек концерттарында йыш ҡатнашам, әммә шәхсән бындай аҙымды тәү тапҡыр яһауым. Балаларҙы 29 ғин­уар­ҙа үтәсәк “Осрашыу көтәм” тигән та­ма­шама саҡырам, уларҙың наҙға сар­са­ған күңелдәренә аҙ ғына булһа ла дәрт, яңы­лыҡ өҫтәгем килә, – тип белдерҙе йырсы.
Балалар йорто тәрбиәләнеүселәре лә ҡунаҡҡа халыҡ һәм заманса бейеүҙәрҙән, йыр-моңдан торған концерт әҙерләгәйне.
Ишле ғаиләлә тыуып үҫкән, тулы тәр­биә алған Диана Ишниязованың ихтирам һәм иғтибарға лайыҡ осрашыуын уның ба­ла саҡтағы изге хыялын тормошҡа ашы­рыуға бер аҙым тип атарға ла була.
– Заманында аҡсаны ғына иң ҙур бай­лыҡ тип һанап, уны күп итеп алып, иң тәүҙә әсәйемә мөһабәт, матур йорт төҙөргә, һу­ңынан Ер йө­ҙөн­дәге барлыҡ мохтаждарға, ауыр хәлдә ҡалғандарға ярҙам ҡулы һу­ҙыу, бәхет таратыу ине хыялым, – тип серҙәре менән уртаҡлашты сәхнә йондоҙо.
Тығыҙ ижади эшмәкәрлек мәшәҡәт­­тә­ре ара­һында ваҡыт табып килеп, йөрәк йы­лыһына зарыҡҡан балалар менән аралашыуы, һис шикһеҙ, йырсы күңе­ле­нең киң­леген, юға­ры­лығын билдә­ләй. Ш. Хо­ҙай­бирҙин исемен­дә­ге 1-се респуб­лика балалар йорто ди­рек­торы Фә­нисә Бәҙ­ретдинова етәкләгән һоҡ­ланғыс коллек­тивтың һәр кемде ихлас ҡаршы алып, ҡунаҡсыл, йылы хөрмәт күрһә­теү­ҙәре лә – уларҙың иң ауыр һө­нәр­ҙе намыҫлы, етди башҡарыуын дәлилләй.


Радмила Хәлилова (14 йәш):
– Диана Ишниязованы телевизор­ҙан ғына түгел, үҙебеҙҙең сәхнәлә лә кү­реүемә бик шатмын. Тәрбиәсе­ләре­беҙ менән концерт-театрҙарға йыш йө­рөйбөҙ, мин үҙем дә йырларға, бейергә яратам.