...2002 йыл. Театр беренсе тапҡыр Себер яҡтарына гастролгә сыҡҡан. Ханты-Манси һәм Ямал-Ненец автономиялы округтарында йәшәгән театр һөйөүселәр һәм Башҡортостандан шул тарафтарға китеп төпләнгән яҡташтары алдында Мәскәү драматургы Надежда Птушкинаның “Алдан түләйем!” исемле комедияһын күрһәтәләр. Ролдәрҙә — Фидан Ғафаров, Эльвира Юнысова, Миңзәлә Хәйруллина, Алһыу Ғәлина.
Өс аҙналыҡ сәфәр Лянтор ҡалаһына килеп терәлә, төркөмдө нефтселәрҙең ҡунаҡханаһына урын­лаштыралар. Бын­да вахта ысулы менән килеп-ҡайтып эшлә­гәндәр йәшәй. Киске спектакль алдынан, буш ваҡытты файҙаланып, гастролгә сығыу­сылар телевизор ҡарап, әңгәмә ҡороп, ял бүлмә­һендә ултыра. Театр хеҙмәт­кәрҙәренән, артистарҙан тыш ике-өс нефтсе лә дивандан урын алған.
Ҡунаҡтарҙың Өфөнән икәнле­ген, гастролгә килгәндәрен белгәс, араларынан берәүһе: “М-да... Йәш саҡта театрҙы бик күп ҡаралды инде...” — тип һүҙ башлай. Уға икенсеһе лә ҡушыла: “Хәҙерге театр элекке һымаҡ түгел шул — бөтөнләй ят артистар уйнай... Дөрөҫөн әйткәндә, “оҙон” аҡса артынан ҡыуып, спектак­л­дәргә йөрөргә ваҡыт ҡалмай. Ә бар ине бит заманалар — Башҡорт академия драма театрына барып, Фидан менән Нурияны ҡарап ҡайта инек...” — тип үҙ заманының матур хәтирәләре менән уртаҡлаша. Уның һүҙен тәүгеһе бүлдереп: “Әйткәндәй, Фидан миңә ту­ған тейешле. Бигүк яҡын түгел, әммә гел генә уның менән аралашып йәшәнек!” — тип данлыҡлы артист менән таныш булыуы хаҡында ғорурланып әйтеп һала. Шунан эргәһендә ултырған билдәле артисҡа боролоп:
— Фидан хәҙер Башҡорт академия драма театрында эшләмәй, уның үҙе­нең театры бар, тиҙәр. Ҡартайғандыр ҙа, уйнамайҙыр ҙа... Беҙ йәш саҡта ла оло ине бит ул... Шулай ҙа туған театрына Фидан килмәй тормаҫ — күрһәгеҙ, фәлән­дән сәләм әйтегеҙ, йәме?!” — ти.
Сәләм юллаусының үҙенә тө­бәлгән һораулы ҡарашын тойоп, бер аҙ шаяртып алыу теләге менән дә, Фидан Сафа улы: “Ярай, күрһәк, әйтербеҙ. Тик бына ул сит илдә йәшәй, сереп байыған, имеш, тиҙәр бит әле, ҡустым. Туған кешенең сәләмен шулай ҙа еткерергә тырышырбыҙ”, — тип үҙенең “яңы туғанын” тынысландыра...