Һөҙәк тауҙар араһына һыйынып ул­тыр­ған Мәсетауыл, хозур Әй йылғаһы, бәләкәй саҡта аунап үҫкән бәпкә үләне – йәнгә йылы, күңелгә рәхәтлек биргән тыу­ған тарафтар.
Ауылыма һәр саҡ елкенеп ҡайтам. Был юлы 60 йәшемде билдәләргә тип, оло һөйөнөс менән күмәкләп, Башҡорт­остандың күренекле әҙип-эшмәкәрҙәре – күренекле ғалим, филология фәндәре док­торы Ғиниәт Ҡунафин, Салауат Юлаев исемендәге дәүләт премияһы лау­ре­аты Таңсулпан Ғарипова, “Баш­ҡорт­остан” гәзитенең баш мөхәр­рире Нияз Сәлимов, балалар әҙибәһе Фәрзәнә Ғөбәйҙуллина, ҡатыным, ҡыҙым, һең­лем­дәр менән бергә йыйындыҡ.
Дыуан-Мәсетле урта мәктәбе директоры Анфиса Ғәйнетдинова, уның урын­баҫарҙары Лариса Ғәйнуллина, Флүрә Йәрмөхәмәтова, уҡытыусылар Данис Ғә­лимов, Гөлсөм Абдрахманова, Лена Фазылова тырышлығында кисә ойоштороп, ҙур табын менән ҡаршы алдылар. Бала саҡтан күңелемә яҡын булған йөҙҙәр, таныш йылмайыуҙар, яғымлы ауаздар, ҡотлау һүҙҙәре йөрәк­тәге моңһоу иҫтә­лектәрҙе һәм йылы рәхмәт тойғоһон уятты.
Юбилей сараларының уртаһында Ды­уан-Мәсетле ауыл Советы хакимиәте башлығы Мәғәмүр Ханнанов ҡайнап йө­рөй. Иҫләйем, уның атаһы, күрше Буран­сы ауылында йәшәгән Муллаяр ағай, элек бик бөтмөр шофер ине, йөк ма­шинаһында йөрөнө.
Аралашҡан ваҡыт эсендә байтаҡ нәмә асыҡ­ланғандай итте, дөрөҫө, тыуған ауы­лымдың эске тормошоноң шаршауы һыпырып ташланды.
Башҡортостан Хөкүмәте 2011 йылда ҡабул иткән Төньяҡ-көнсығыш район­дарҙы үҫтереү программаһына ярашлы төбәктең иҡтисады күтәрелергә, халыҡ­тың социаль, мәҙәни тормошо яйға һалы­нырға тейеш. Сер түгел, был тарафта йәшәүселәрҙең хәле республика­быҙҙың башҡа яҡтарына ҡарағанда мөшкөлөрәк: сәнәғәт предприятиелары юҡ тиерлек, колхоз-совхоздар бөтөрөл­гәс, йәштәр эш эҙләп күрше өлкәләргә, Себергә китә. Ата-бабанан ҡалған, боронғо кәсеп булған урмансылыҡ, ба­лыҡсылыҡ, һу­нар­сылыҡ менән шөғөл­ләнеү бөгөн отошло түгел, онотолған да. Халыҡ мал тота, баҡса үҫтерә, умарта­сылыҡ менән булаша, әммә алыш-биреш хөрт бара, үҫтергәнде, итте, һөттө, баш­ҡаһын үҙ хаҡына һатыу ауыр. Алып­һатарҙар, мә­ҫәлән, итте, картуфты бик осһоҙға алып китә, халыҡ быныһына ла күнгән.
Заманында, уҙған быуаттың 60-сы йылдарында, гөрләп торған ауылымда “Комсомолец” колхозының көсө менән ҙур клуб һа­лынды, районда тәүгеләрҙән булараҡ ике ҡатлы кирбес мәктәп, идара йорто төҙөл­дө. Ғөмүмән, Мәсетауыл ти­рә-яҡтағылар өсөн үҙәк, елдәргә биреш­мәгән төйәк ине.
Бөгөн уға яңы һулыш өрөү фарыз, үҙендә балалар баҡсаһын, спорт залын, китапхананы берләштергән яңы мәҙәни үҙәк асырға ине. Иҫке клубты эшҡы­уар­ҙарға ҡуртымға бирергә була. Ауыл йәш­тәре 17 саҡрым алыҫлыҡта ятҡан Мәсә­ғүткә эшкә йөрөй, мал тота, кешесә йәшәр өсөн мәктәп бар, әммә арыуыраҡ балалар баҡсаһы кәрәк, сөнки бөгөнгөһө бәләкәй генә өйҙә урынлашҡан. Ундағы 30 бала ике төркөмгә бүленгән, “сиратта тағы 30 бала тора” тип һөйләй ауыл хакимиәте башлығы. Шул сабыйҙарға урын табылһа, йәштәр ауылда төпләнеп, гөрләтеп йәшәр ине! Һыу бар, мәктәп – эргәлә, Әй буйының тәбиғәте бынамын тигән йәмле. Йәштәр китапханаға килһен, спорт залында шөғөлләнһен, юғиһә ха­лыҡ буш ваҡытын нисек, ҡайҙа үткә­рергә белмәй, тормоштан йәм тапмай ыҙалай. Шуға ла минең төп хыял­дарымдың береһе – ауылда мәҙәни үҙәк төҙөү.
Дыуан-Мәсетлелә мәҙәни үҙәк төҙөү үрҙә аталған дәүләт программаһына ла ингән, тик бойомға ашырыу ғына һуҙыла. Һайлауҙар осоронда был хаҡта һүҙ, вәғәҙәләр күп булды, әммә йөк һаман урынында…
Дыуан-Мәсетле, ғөмүмән, был төбәк­тең үҙәк урындарының береһе, уға күрше ауылдарҙан да халыҡ күп килә. Мәсетле районының ауылдарын икегә бүлгән Әй йылғаһы аша Ғүмәр ауылына күпер һа­лынғас, халыҡ һөйөнә, Яңы Мишәр, хатта Ҡыйғы районы ауылдары рәхмәт уҡый. Был шатлыҡҡа өлгәшеүҙә Мәғәмүр Муллаяр улының өлөшө ҙур.
“Һалым йыйыу, эскелеккә ҡаршы кө­рәш, ғаиләләге ығы-зығыны хәл итеүҙәр көндәлек мәшәҡәт кенә, иң мөһиме – килә­сәк быуынға минән аманат булып ҡалырҙай күпер һәм мәҙәни үҙәк төҙө­төү”, – ти Мәғәмүр Зәйнулла улы. Изге ниәтле ир-атҡа ғәйрәт һәм уңышлы юлдар теләп ҡалабыҙ.