Башҡортостандың халыҡ шағиры Мос­тай Кәримдең тыуыуына 95 йыл тулыуға арналған “Аҡйондоҙ менән Аҡйегет” тип аталған бәйге әҙәбиәтебеҙ аҡһаҡалының тормошон сағылдырған видеояҙманы күрһәтеүҙән башланды. Мостай Кәримдең экрандағы алсаҡ йылмайыуынан тотош залға нур бөркөлдө, үҙе уҡыған шиғырҙа­ры йәнде наҙланы.
... Ҡапыл әкиәт иленә барып сыҡҡан­дай хис иттем үҙемде: күлдәге аҡҡоштай береһенән-береһе матур, һөлөктәй һом­ғол буйлы ҡыҙҙар сәхнәнән йөҙөп үтте. Эх!.. Шул саҡ Баймаҡ еренең данлы улы, талантлы шағир Рәйес Түләктең шиғыр юлдары күңелде семетеп алды:
Мин Иҫәнгә быйыл кейәү булып
Йә көтөүсе булып барайым...
Ошондай гүзәллекте, ошондай нәзәкәт­лекте күреп, күңел ымһынмаҫлыҡ түгел шул! Сәхнәләге ҡыҙҙарҙан Аҡйондоҙҙоң, Зөбәржәттең сибәрлеге, сафлығы бөркө­лә ине.
Ҡыҙҙарҙың артынан сәхнәгә бөркөттәй талпынып сыҡҡан егеттәрҙе күреп, йө­рәкте ғорурлыҡ тойғоһо биләне: бар бит, бар(!) халҡыбыҙҙың рухлы уландары!
Бәйге башланды. Уның йыр-моң менән аралашып барыуы былай ҙа тулышҡан хистәрҙе таштырып ебәрҙе. Мостай Кә­рим шиғырҙарына яҙылған йырҙарҙы Илдар Абдуллин, Ильяс Байғышаев, йән йылыһына төрөп, тамашасы йөрәгенә һалды. Буранбай ауылының рухлы ҡыҙы Мәҙинә Туйсина шағирҙың “Үҙемә әйткән һүҙ” әҫәрен һоҡланғыс итеп һөйләне.
Бәйгелә ҡатнашыусылар Мостай Кә­римдең “Айгөл иле”, “Ҡыҙ урлау”, “Ай то­толған төндә”, “Салауат”, “Прометей” әҫәр­ҙәре буйынса ҡуйылған спектакл­дәрҙән өҙөктәр күрһәтте, атаҡлы ша­ғи­рыбыҙҙың шиғырҙарын һөйләне, һо­рау­ҙарға яуаптар бирҙе.
Шулай итеп, матурлыҡ һәм батырлыҡ сағылышы булған “Аҡйондоҙ менән Аҡ­йегет” бәйгеһендә төп бүләкте Әхмәр ауылынан Наҙгөл Бикмырҙина менән Байрас Азаматов яуланы. Ләкин был һөйөү аҡ­ланында еңелеүселәр булманы. Егет һәм ҡыҙҙарҙың йөҙөндә мөхәббәт бал­ҡышын, бәхет аңҡышын тойҙом – ошонан да ҙурыраҡ еңеүҙең булыуы мөмкин түгел!
“Аҡйондоҙ менән Аҡйегет” бәйгеһе 1998 йылдан бара. Ул башта – ауыл­дарҙа, йомғаҡлау өлөшө Баймаҡ ҡала­һында үтә. Бәйгене район китапханаһы директоры Луиза Ҡаһарман ҡыҙы Дәү­ләтшина ойоштора. Ҡаһарман йөрәк­ле, мөләйем йөҙлө апайҙың ил, тел, мил­ләт өсөн янып йәшәүенә ихлас һоҡландыҡ беҙ. Эйе, халҡым тип тамаҡ ярмай ғына изге эштәрен башҡара Луиза Ҡаһарман ҡыҙы. Нәҡ шундай рухлы апайҙар хаҡында Ил инәһе тиҙәр ҙә инде!