Был һуғышта илебеҙҙе һаҡлап ҡан ҡойғандар бөгөн донъяла бар­маҡ менән генә һанарлыҡ, тип әй­тергә мөмкин. Ләкин батырлыҡ оно­толмай, ул киләһе быуындар кү­ңелендә лә ныҡлы урын алырға тейеш.
Быйыл 17 ноябрҙә 112-се Баш­ҡорт кавалерия дивизияһы ойош­торо­лоуға 70 йыл тула. Ошо уңай­ҙан Борис Малородов менән Наил Шәйәхмәтов урыҫ телендә яҙылған “Несокрушимая и легендарная 112-я” тигән китап сығарҙы. Дивизияның данлы һәм ҡанлы юлы хаҡында киң мәғлүмәт, Укра­инаның өлкән быуын кешелә­ренең рәхмәт һүҙҙәре, фотоһүрәт­тәр урын алған ҙур эш һоҡланыуға лайыҡ. Миңлеғәле Шайморатовтың легендар командир булғанлығы йәнә бер иҫбатлана унда. Автор­ҙарҙың әйте­үенсә, ҡаһармандың ил алдындағы хеҙмәте артабан да өйрәнелергә тейеш. “Был инде тарих­сыларҙың, йәш­тәрҙең на­мыҫың­да”, — ти улар.
Яңы китаптың Баш­ҡор­тостан тарихын өй­рә­­неүҙә, йәш быуын кү­­ңе­­лендә илһөйәрлек тәр­биәләүҙә өлөшө баһа­лап бөткөһөҙ буласаҡ. Уны төҙөүгә, ха­лыҡҡа еткереүгә өлгәш­кән Борис Малородов менән На­ил Шәйәх­мәтов­ҡа ҙур рәхмәт! Шул уҡ ва­ҡытта киләсәктә диви­зияның барлыҡ яу­гир­ҙә­ренең батырлыҡ­тары са­ғыл­­дырылырына, хеҙмәт башҡорт телендә лә нәшер ителеренә ышаныс бар.
112-се Башҡорт кавалерия диви­зияһы музейында китаптың исем туйы уҙғарылды. Унда был хеҙмәттә мәҡә­ләләре менән сығыш яһаған про­фессорҙар Р. Зинуров, В. Са­фин, БДУ-ның тарих факультетынан Н. Ҡал­мантаев, Миәкә районы хакимиәте етәкселеге, күренекле ҡәләм оҫта­лары, уҡытыусылар, йәш быуын, Дим районы халҡы ҡат­нашты. Музейҙың етәксеһе Илүзә Ғәйнуллина сараны фәһемле, иҫтә ҡалырлыҡ итеп ойошторҙо.
Данлы дивизияға етәкселек иткән ҡыйыу, тәрән белемле, оҫта етәк­сегә Советтар Союзы Геройы исемен биреүҙе юллап, 700 меңгә яҡын ҡултамға йыйылып та, был эштең тормошҡа ашырылмауы халыҡта күп һорау тыуҙыра.