...Тормош һин уйлағанса ғына бармай шул: йәш әсәгә, Радмир менән Зарема­һын алып, атай йортона ҡайтырға тура килә. Ауылда эш юҡ, етмәһә, балалары бәләкәй. Ҡайҙа барып һуғылырға, нимә эшләргә белмәй аңҡы-тиңке йөрөгән Светлана, бер ваҡыт сәйлән менән булышып, ҡыҙына муйынсаҡ теҙеп таға. Матур биҙәүес үҙен дә ҡыҙыҡһындыра. Шунан һуң Интернет аша сәйләндән биҙәүес эшләүселәр сайтына барып юлыға. Баш­ҡаларҙан айырылып торһон типме, әллә күңел ҡушыуы буйынсамы, ул башҡорт ҡатын-ҡыҙҙары биҙәүестәренә тотона. Шулай итеп, үҙенә оҡшаған шө­ғөл таба — ҡашмау, һаҡал, селтәр эшләй башлай.
— Тәүгеләрендә үк ырыуыбыҙ там­ғала­рын ҡулланыу бурысын ҡуйҙым, — ти Светлана Нурислам ҡыҙы. – Өйрәнеү өсөн Мәрйәм Бураҡаеваның китаптарын уҡыным, Әсмә Усманова менән кәңәш­ләштем, Интернеттан ырыу тамғаларын эҙләнем. Байтаҡ гәзит-журнал ҡарап, тәжрибә тупланым. Үҙемә кәрәкле әйбер­ҙәрҙе яҙҙыртып та, Орск ҡалаһы магазиндары буйлап эҙләп тә алырға тура килде. Иң беренсе һаҡал эшләнем. Әсәйемә ҙур рәхмәт, ул ҡеүәтләп, һәр башланғы­сым­ды хуплап, ярҙам итеп тора.
Төндәр буйы ултырып, күҙ нурҙарын түгеп, күңел йылыһын ҡушҡан ҡул эштәре аҡрынлап сағыу биҙәүестәргә әүерелә. Ҡашмауҙарҙы, һаҡал-селтәрҙәрҙе за­уыҡ­лы итеү өсөн күпме ваҡыт сарыфлағанын оҫта үҙе генә белә.
Сәйлән менән булы­шыу­ҙан тыш, Светлана Ибраһимова Мәскәү ҡа­лаһы менән Алтай өлкә­һенән тәңкәләр яҙ­ҙыр­тып алып, алҡалар, сулпылар, бе­ләҙек һәм му­йынсаҡтар яһай. Йәш­тәр, оло йәш­тәге ҡатын-ҡыҙ илаһи матурлыҡ алдында түҙеп тора алмай, биҙә­үес­­тәрҙе даими ала. Тик ҡашмау менән һаҡалды һатыуы ауырыраҡ икән, сөнки ай­ҙар буйы эшлә­гән биҙә­үестәрҙең хаҡы осһоҙ тү­гел. Әммә ул башҡа урындарҙа күпкә ҡиммә­терәк. Мәҫәлән, селтәр менән ҡашмау бер­гә 10 мең һум тора. Сәйләндән эшләнгән муйынсаҡтарҙы 300 һумға алырға мөмкин.
Әйткәндәй, Светлана Ибраһимова ҡул­дары тыуҙырған мөғжизәләр Санкт-Петербург ҡалаһы һабантуйында, Салауат районындағы Салауат йыйынында ойошторолған күргәҙмәләрҙә хужаһына уңыш килтергән.
Киләсәктә Светлана Нурислам ҡыҙы яратҡан шөғөлөн киңәйтергә, милли биҙә­үестәрҙе төрләндереп, һаҡал-ҡашмау­ҙарға ырыу тамғаһы һалып эшләргә йыйына. Тик уны һатыуға сығарыуҙа ра­йондың мәҙәниәт етәксе­леге ярҙам итһә ине. Үҙ төбәгендә эшләнгән биҙәүестәрҙе урындағы фольклор ансамблдәре артис­тары өсөн алырға була. Шулай уҡ ауыл­дарҙағы ағинәйҙәр ойошмаһына ла сығыштары өсөн биҙәүестәрҙең кәрәк булыуы ихтимал.
Төпкөл Ғәлиәхмәттә хал­ҡы­быҙҙың онотолоп барған бер шөғөлө тергеҙелде. Уны артабан үҫтергәндә һәй­бәт булыр ине.