Унда Урал аръяғындағы район-ҡалаларҙан, Өфөнән, Благовар районынан килгән өс тиҫтәнән ашыу ҡу­райсы һәм алты ансамбль, ике төр­көмгә бүленеп, үҙ һәләттәрен күрһәт­те. Әлбиттә, сығыш­тарҙа төп урынды Ишмулла ағайҙың көйҙәре биләне. Баһалама комиссияһына И. Дилмөхә­мәтов исемендәге премия­ның беренсе лауреаты, Салауат Юла­ев исе­мен­дәге дәүләт премияһы лау­реаты, ха­лыҡ артисы, яҡташыбыҙ Азат Айыт­ҡолов етәкселек итте.
Конкурс хужаларҙың “Таштүре итә­гендә” бейеүе менән асылды. Унан ҡунаҡтарҙы һәм бәйге­се­ләрҙе Матрай ауыл биләмәһе хакимиәте башлығы Илгиз Аҡҡусҡаров тәбрикләп, уңыштар теләне. Азат Айытҡолов иһә Ишмулла ағай менән бергә эшләү дәүерендәге хәтирәләре менән уртаҡлашты.
Сәхнәгә башта бер-бер артлы 16 йәш­кә тиклемге үҫмер ҡурайсылар, артабан ансамблдәр күтәрелде, һуңы­нан сират тәжрибә туплап өлгөргән ир-егеттәргә етте.
Һыҙҙырып ҡурайҙа уйнап, көй артынан көй ағы­ла торғас, йомғаҡ яһарға ла ваҡыт етте. Һөҙөмтәлә ансамблдәр араһында (үҫмерҙәр) Ейәнсура райо­ны­ның “Ете таж” төркөмө (етәксеһе – И. Хөсәйенов) еңеүсе булһа, икенсе урын Хәйбулла районының “Үҫәр­гән”е­нә ( етәксеһе – И. Юнысов) бирелде. Өлкәндәр араһында Хәй­булла­нан “Түңгәүер” (етәксеһе – И. Юнысов) еңеүсе тип танылды. Баймаҡтан У. Аслаев етәкселегендәге ансамбль — икенсе һәм хужаларҙың Д. Нәҙерғолов әҙерләп алып килгән төркөмө өсөнсө урынға лайыҡ булды.
Яңғыҙ башҡарыусылар араһында 16 йәшкә тиклемгеләрҙән Юлай Ҡаси­мов менән Әғләм Юлгилдин (икеһе лә – Йылайырҙан) тәүге ике урынды яуланы. Өлкәндәрҙән Илдар Юнысов (Хәйбулла) еңеүсе булды, икенсе урынға – Баймаҡтан килгән билдәле йырсы Юнир Һағынбаев, өсөнсөгә Исҡужанан Динар Абдуллин сыҡты.
Шулай уҡ Ғәлинур менән Илгиз Нәҙерғолов (Йылайыр), Рәүеф Ҡан­сурин, Рәмил Хәсәнов (Баймаҡ), Илмир Ҡоҙабаев (Благовар) төрлө номинацияла баһаланды. Конкурста ҡатнашҡандарҙың барыһына ла Маҡ­тау грамотаһы һәм иҫтәлекле бүләктәр тапшырылды.
Һуңынан ойошторолған концертта Юлдыбайҙан Фатима Айытҡолова менән Матрайҙан Гөлсимә Сәйетова боронғо халыҡ йырҙарын тәҡдим итте. Илдар Юнысовтың “Кәкүккәй”, Азат Айытҡоловтың “Шафиҡ”, “Ҡолой кантон” һәм Ишмулла ағай көйҙәрен оҫта башҡарыуы үҙе бер өлгө кеүек тойолдо. Юнир Һағынбаевтың Ишмулла Дилмөхәмәтов менән Рөстәм Шәриповтың яҡты иҫтәлегенә бағыш­лап башҡарған йыры күңелдәге һа­ғыш, ғорурлыҡ тойғоларын көсәйтеп ебәрҙе.
Быуаттар төпкөлөнән беҙҙең быуын ҡулына килеп эләккән хазинаның — ҡурайҙың – баһаһы бер ҡасан да төш­мәҫенә шик юҡ.