Өсәүләп йә иһә дүртәүләп ҡала сәхнә­ләрендә сығыш яһап, йыш ҡына һәр төрлө фестивалдә, бәйгеләрҙә тәүге урындарға лайыҡ булған был дүрт ағай-эненең береһе лә һөнәре буйынса сәнғәт кешеһе түгел.
Хәҙер һирәк ишетергә тура килгән мандолина ҡылдарын ифрат оҫта сирткән Ғай­са, бәләкәй генә гармунда башҡорт көй­ҙәрен һоҡланғыс итеп башҡарған Хәлил ағайҙар – армияла 25-әр йыл хеҙмәт итеп ҡайтҡан хәрбиҙәр. Уҙған быуаттың алтмышынсы йылдары башындағы тәүге дәһ­шәт­ле стратегик ракета ғәскәрҙәре сос­та­­вын­да дежурға баҫҡандар исемлегендә капитан Ғайса Һөйөндөков та бар. Ә отставкалағы подполковник, хәрби табип Хәлил ағайҙы яҙыусы-прозаик тип тә беләбеҙ. Хикә­йә­ләре һәм повестары матбуғат биттәрендә даими баҫылып тора. Автор төрлө йыл­дарҙа бер нисә гәзит һәм журналдың йыл лауреаты итеп билдәләнде.
Һирәк башҡарылған башҡорт халыҡ йыр­ҙарын тамашасының үҙәгенә үтерлек итеп еткергән Юлай Төхфәт улы – юғары категориялы табип-судмедэксперт, Баш­ҡорт­остан­дың һаулыҡ һаҡлау отличнигы, Сибай район-ара суд-медицина бүлеге мөдире.
Һөйөндөковтарҙың иң кесеһе Йәлил ағай хаҡында айырым телгә алыу дөрөҫ булыр. Бар донъяңды оноторлоҡ итеп баянда уйнаған был ир-азамат – танылған ғалим, Башҡортостандың атҡаҙанған фән эшмә­кәре, биология фәндәре докторы, профессор, Башҡортостан Фәндәр академияһының мөхбир ағзаһы, Рәсәй тәбиғи фәндәр ака­демияһы академигы. Әле Башҡортостан төбәк тикшеренеүҙәр институты директоры вазифаһын башҡарған Йәлил Төхфәт улы һәр төрлө мәҙәни сарала ҡатнашырға ла ваҡыт таба. Бынан бер нисә йыл элек Баймаҡта “Уйна, гармун!” бәйгеһендә төп бүләкте яулағайны.
Үҙ-ара дуҫ бер туған дүрт ағай-эненең һәр ғаилә тантанаһы үҙе бер концерт программаһындай үтә. Мәжлестәрҙә төп иғтибар халҡыбыҙҙың боронғо йырҙарына бирелә.
Мәҙәни мөхиттән йыраҡ торһа ла, бар булмышы менән йыр-моңға маһир, сәнғәтте яратҡан Һөйөндөковтарға һоҡланмау мөм­кин түгел.