Ырымбур губернаһының 270 һәм өлкәнең 80 йыллыҡ юбилейы уңа­йынан үткәрелгән сараға Башҡорт­остан, Татарстан, Мари Иле рес­публикаларының, Һамар, Һары­тау, Ульяновск, Новгород, Пенза өлкәләренең, Пермь крайының, шу­лай уҡ Мәскәүҙең театрҙары са­ҡырылған. Беҙҙекеләр иһә рес­­­публикабыҙҙа ҙур уңыш менән барған «Маҡтымһылыу, Әбләй һәм Ҡара юрға» мюзиклын (авторы – Т. Ғарипова, режиссеры – О. Ханов) тәҡдим иткән.
– Һәр коллективтың сығышын Мәс­кәүҙән Константин Щербаков, Нина Карпова, Марина Корчак кеүек билдәле театр тәнҡитселәре баһа­ланы, – тип тәьҫо­раттары менән уртаҡлашты Башҡорт дәүләт академия драма театрының художество етәксеһе Олег Ханов. – Шуныһы һөйөнөслө: костюм­да­р­ҙың сағыу­лығы ла, сәхнәнең биҙәлеше лә, артистарҙың бирелеп уйнауы ла жюри ағзаларын ҡыуандырҙы. “Был мюзикл аша илебеҙҙең мәҙәни үҫешен күрәбеҙ. Әгәр ҙә бындай әҫәр булмаһа, уны мотлаҡ тыуҙырырға кәрәк ине. Халыҡ ижадын йәш быуынға еңел һәм аңлайышлы итеп еткерә алғанһығыҙ”, – тинеләр.
Был фестивалдә ниндәйҙер урындар биреү ҡаралмаған, театрҙарҙың бер-бе­ре­һенең ижад емештәре менән танышып, фекер алышыуын ғына маҡсат итеп ҡуй­ғандар. Ә шулай ҙа тамашасылар «Маҡ­тым­һылыу, Әбләй һәм Ҡара юрға» мю­зик­лын йылы ҡабул иткән. Бигерәк тә Руслан Хайсаров, Ирада Фазлаева, Хөрмәтулла Үтәшев, Гөлнара Әмирова, Гөлмирә Исмәғилева­ларҙың оҫта уйнауын яратып өлгөр­гәндәр. Һөҙөмтәлә, күпселек халыҡтың фекерен иҫәпкә алып, башҡорт академия драма театры коллективын “Тамашасылар һөйөүе” номи­на­ция­һында тәбрикләп, төп бүләкте тап­шырғандар. Хатта фес­тивалдең директоры Павел Церемпилов, сәхнәгә сығып, Маҡ­тымһылыу ролен башҡарған Ирада Фазла­еваның яурынына башҡорт шәлен һалған.
Билдәле булыуынса, «Маҡтым­һылыу, Әбләй һәм Ҡара юрға» былтыр Баш­ҡортостан Президенты грантына лайыҡ булып, шул иҫәпкә сәхнәләштерелде. Был юлы әҫәргә ил кимәлендә юғары ба­һа биреүҙәре лә төп милли театры­быҙҙың уңышлы ижад итеүен иҫбатлай.