Башҡортостан «Китап» нәшриәте Рәсәйҙең иң яҡшы китап учреждениелары иҫәбенә инде

Зәйнәб Биишева исемендәге Башҡортостан «Китап» нәшриәте беренсе тапҡыр 2024 йылда дөйөм тираж күләме буйынса Рәсәйҙең 50 нәшриәте иҫәбенә инде. Был турала Рәсәйҙең китап палатаһы мәғлүмәттәренән билдәле булды. «Китап»тың тиражы – 609,46 мең дана.

Республика нәшриәте директоры вазифаһын башҡарыусы Эльмира Хәйретдинова «Башинформ» агентлығына биргән интервьюһында «Китап»тың абруйлы федераль рейтингка ингән берҙән-бер милли дәүләт нәшриәт булыуы хаҡында һөйләне.

«Былтыр беҙҙә 151 китап баҫылып сыҡты, бүләк баҫмалары ныҡ күп булды. Шулай уҡ беҙ төбәк һәм ил күләмендә 16 награда алдыҡ, икенсе йыл рәттән «Башҡортостандың 100 иң яҡшы тауары» һәм «Рәсәйҙең иң яҡшы тауарҙары» билдәһенә эйәһе булдыҡ. Республиканан ситтә лә башҡорт китаптарына ҡыҙыҡһыныу бар – маркетплейстарға сығарғас, һатыу ҡырҡа артты, баҫмалар Ҡаҙағстанға, Белоруссияға һәм башҡа илдәргә оҙатылды», — ти мәғлүмәт агентлығы әңгәмәсеһе.

Нәшриәт 30 майҙан 1 июнгә тиклем Өфөнөң Совет майҙанында үтәсәк «Китап байрамы» халыҡ-ара китап йәрминкәһенә бик күп ҡыҙыҡлы саралар планлаштыра, тип билдәләне Эльмира Хәйретдинова.

«Китап байрамы алдынан һәм күргәҙмәлә уҙған йылдың аҙағында донъя күргән ҡыҙыҡлы китаптарҙың исем туйы үткәрелә. Шулай уҡ бында Рәсәй нәшриәттәре араһында «Урал батыр ерендә йыл китабы» конкурсы ойошторола. Күп нәшриәттәр беҙгә килергә тырыша, сөнки Китап байрамында баҫмалар яҡшы һатыла, беҙ башҡа төбәктәр менән килешеүҙәр төҙөйбөҙ, авторлыҡ хоҡуҡтары менән эш итеү тәжрибәһе менән уртаҡлашабыҙ. Ә 9 майға аудиоҡушымта менән бергә башҡорт телендә «Геройҙар юлы менән» китабын әҙерләйбеҙ. Унда Бөйөк Ватан һуғышы, махсус хәрби операция хаҡында хикәйәләр туплана», – тине ул.

Ҡағыҙ баҫмаларҙан тыш, «Китап» аудиокитаптар йүнәлешен дә үҫтерә.

«2023 йылдан әҫәрҙәребеҙҙең аудиоверсиялары сыға, улар айырыуса йәштәр араһында бик популяр. Шулай уҡ китап уҡыуға иғтибарҙы йәлеп итеү өсөн кино тураһында лекциялар циклын башланыҡ», — тип һөйләне Эльмира Хәйретдинова.

Хәтерегеҙгә төшөрәбеҙ, 2024 йылдың 14 сентябрендә баш ҡаланың тарихи үҙәгендә «Китап» нәшриәтенең фирма магазины асылды. Унда башҡорт, рус, татар, удмурт, инглиз, немец һәм башҡа телдәрҙә баҫылған китаптар һатыла.

https://www.bashinform.ru/news/culture/2025-03-12/bashkirskoe-izdatelstvo-kitap-voshlo-v-top-knizhnyh-uchrezhdeniy-rossii-4153959