Халыҡ йолаһының “үргенсә” варианты ла бар.

Ейәнсура районының ауыл биләмәләре араһында республиканың 100 йыллығына арналған эстафета-марафоны бара. Сара сиктәрендә һәр биләмә үҙенең үткәне һәм бөгөнгөһө менән таныштыра, тыуған ергә дан йырлай. Район етәкселеге халыҡ менән осраша, проблемаларҙы барлай, һорауҙарға яуап бирә. Кешеләрҙең осрашыуҙа әүҙемлеге, ауылдарҙың киләсәге өсөн борсолоуы, мәсьәләләрҙе хәл итеү юлдарын эҙләүе өмөт уята.

Фестиваль Байдәүләт ауыл билә­мәһендә башланып, Һүрәм, Таҙлар, Бикбау, Яңы Себенле биләмәлә­рен­дә дауам итте. Уларҙан һуң Яңы Петровка вәкил­дәре майҙан тотто: Үрген ауылы мәҙәниәт йортон­да әҙерләнгән күргәҙмәлә үҙҙә­ре­нең йәшәйешен кәүҙәләндерҙе. Элек­ке радиотехника, хәреф баҫыу машинаһы, етеле шәм, биҙәнеү әй­бер­ҙәре йәш быуында айырыуса ҡы­­ҙыҡһыныу уятты. Өлкәнерәктәр иһә төрлө йылдар, таныш йөҙҙәр са­ғылған фотоһүрәттәрҙе ҙур ҡәнә­ғәтлек менән ҡарап, хәтирә­ләрен яңырт­ты. Ағинәй Гүзәл Аҡсу­рина­ның башҡорт ҡатын-ҡыҙҙары­ның мил­ли биҙәүестәре, Урал Ейән­бир­ҙиндең аҡсалар коллекция­һы күр­гәҙ­мәгә үҙенсәлек өҫтәне. Әминә Кил­дебаева һәм уның иптәше Юлай Аҡсуриндың күргәҙ­мәгә сығарылған “байлыҡтары” һоҡланмаҫлыҡ түгел: йыйып киптерелгән дарыу үлән-та­мыр­ҙары янына ниндәй сиргә һәм улар­ҙы нисек ҡулланыу кәрәклеге лә яҙылғайны. Ә һунарсы Юлай ағай­ҙың “трофейҙары” – төрлө йән­лек тиреләре ҙур ҡыҙыҡһыныу уятты.

Ауылдың ҡатын-ҡыҙҙар советы эшмәкәрлеге фотоһүрәттәрҙә генә түгел, ә ауыл уңғандарының ҡул эш­тә­рендә лә сағылыш тапты. Билә­мәнең мәғариф учреждениелары әҙерләгән күргәҙмәләр йөкмәткеле, мәғлүмәткә бай булыуы менән айырылып торҙо. Бигерәк тә “Айгөл” балалар баҡсаһы тормошон сағыл­дырған экспозиция сағыулығы менән һәр кемде үҙенә йәлеп итте.

Ғәҙәттәгесә, Ейәнсура районы, уның социаль-иҡтисади тормошо хаҡындағы ролик күрһәтелгән арала залға тамашасы шығырым тул­ғай­ны. Башҡа ауыл биләмә­ләренән айырмалы, балаларҙың, концертҡа кескәйҙәре менән килгән йәштәрҙең күплеге күҙгә ташланды. Тамашасылар араһында район хакимиәте вәкилдәре, башҡа биләмә баш­лыҡтарының булыуы сараның мәртәбәһен арттырҙы, Яңы Петровка, Үрген мәктәптә­рендә 40 йылға яҡын директор булып эшләгән шәхестәрҙең, билә­мәнең почетлы граждандары Рәшит Иҙрисов менән Юлай Солтанбаевтың ҡатнашыуы сараның бәҫен күтәрҙе.

Аллаһ Тәғәлә ер бүлгәндә баш­ҡортҡа уның ожмахҡа тиңен биреүе хаҡындағы риүәйәт менән башланып китте концерт. Яңы Петровка ауыл биләмәһендә Яңы Петровка, Башҡорт Үргене һәм Рус Үргене ауылдарында рус, баш­ҡорттарҙың татыу йәшәүе, ауыл­дарҙың һәм халҡының бер быуат­лыҡ тарихы экранда күрһәтелгән фотоһүрәт­тәрҙә асыҡ сағылды. Совет осоронда колхоздың гөрләп торған мәлдәре, ил тарихында ҡан менән яҙылған, биләмә халҡын да урап үтмәгән Бөйөк Ватан, Афған һәм Чечен һуғыштары ла иғтибарҙан ситтә ҡалманы. Фотоһүрәттәр сәхнә­ләге тамаша менән үрелеп барҙы.

Өлкән быуын вәкиле 86 йәшлек Хөрмәт Фәхретдиновтың йырын ауылдаштары йылы ҡабул итте. Әкрәм Солтанбаев республикаға танылған шәхес, халыҡ йырсыһы Иншар Солтанбаев хаҡында бәйән итте һәм уның репертуарынан башҡорт халыҡ йыры “Сибай”ҙы башҡарҙы. Яңы Петровка, Үрген мәк­тәптәре коллективтары, “Айгөл” һәм “Башаҡ” балалар баҡсалары коллективтары, “Еҙәй”, “Ағинәйҙәр”, “Наследие” һәм ир-егеттәр ансамбл­дәре йырҙары менән һө­йөндөрһә, музыка уйын ҡоралдары ансамбле­нең сығышы концертҡа айырым бер үҙенсәлек бирҙе. “Дуҫлыҡ” һәм уҡыусы ҡыҙҙарҙың “Гөлдәр” ансамблдәренең сығышы байрам сараһын икеләтә байытып, тамашасыларға дәрт өҫтәп ебәрҙе.

Концертты әҙерләүҙә йәмәғәт ойош­маларының әүҙемлеге һиҙе­леп тора: йыр булһынмы, бейеүме – ҡатын-ҡыҙҙар советы ағзалары ситтә ҡалманы. Борондан килгән йолаларҙың береһе – “Бәпес үҫтереү”ҙең “үргенсә” вариантын күрһәттеләр. Улар байрам уңайынан ҡунаҡтарға табала картуф бәлеше бешерә – үҙенсәлеге шунда икән. Ағинәйҙәр ҙә йырлап ҡына ҡалманы, ауылдаштарына, бигерәк тә ир-егеттәргә әйтер мөрәжәғәтен халыҡ мәҡәлдәренә таянып еткерҙе.

Йөкмәткеле концерттан һуң Яңы Петровка ауыл биләмәһе башлығы Илфат Аҡсурин эстафетаны һәм уның штандартын Муйнаҡ ауыл би­лә­мәһе башлығы Ғәҙел Шәрә­фет­­диновҡа тапшырҙы. Район хаки­миәте башлығының социаль мәсьә­ләләр һәм кадрҙар сәйәсәте буйынса урынбаҫары Тәлғәт Аҡбутин байрам сараһын йомғаҡ­лап, уны әҙер­ләүгә көс һалған һәр кемгә рәхмәт әйтте.