Бала сағым, үҫмер йылдарым үткән тыуған төйәгемә – Мәсетле районының Ләмәҙтамаҡ ауылына – йыл һайын ҡайтып килергә тырышам. Юлдар төҙөк беҙҙә: такси булһынмы, автобусмы, елдереп кенә алып барып еткерә.


Бер көн шулай техника көтөп торғанда ауылдашым Радик Ба­һа­уетдиновты осраттым. Уның менән йәнәш ултырып, Ләмәҙ­та­маҡҡа еткәнсе әңгәмәләшеп ҡайт­тыҡ. Тыныс, итәғәтле, ябай ир-уҙаман 1979 йылда тыуған. Урта мәктәпте тамамлағас, БДУ-ның тарих факультетына уҡырға ингән. Ғилем туплау йылдарында йәмәғәт эштәрендә әүҙем ҡат­нашыуы йәһәтенән айырылып торған. Мәҫәлән, яҡташы Флүр Дуҫмөхәмәтов менән Мәсетле студенттары ойошмаһын булдыр­ғандар.
Радик Олег улының юғары уҡыу йортон тамамлап, шунда уҡ эш башлағанын, кандидатлыҡ дис­сертацияһы яҡлағанын белә инем. Хәҙер ул докторантурала белем ала, докторлыҡ диссер­та­цияһы әҙерләй икән. БДУ-ның Сибай филиалындағы тарих ка­федраһында ассистент булып эшләгәндән һуң Башҡорт­ос­тан­дың Мәғарифты үҫтереү институтында хеҙмәт иткән, Өфөнөң бер нисә колледжында белем биргән. Әле Радик Олег улы – Башҡорт дәүләт университетының археология һәм этнология кафедраһы доценты, диссертация советының ғилми секретары. Докторлыҡ диссертацияһын республи­кабыҙ­ҙағы билдәле шәхес, тарих фән­дәре докторы, профессор Марат Ҡолшәрипов етәкселегендә яҙа.
Радик Олег улы – бер монография, 25 фәнни мәҡәлә һәм коллектив менән яҙылған ике монография авторы. Йәш ғалимдың ошондай уңыш ҡаҙаныуы – уның маҡ­сатлы, ныҡышмал булыуына, тарих фәнен мөкиббән яратыуына аныҡ дәлил.