Экология һәм махсус һаҡланған тәбиғәт биләмәләре йылында Башҡортостанда “Ҡурсаулыҡ урындары буйлап” төбәк-ара экология марафоны уҙғарыла. Ул Рәсәйҙә ҡурсаулыҡ системаһының 100 йыллығына арнала һәм 6 – 8 июндә халыҡ-ара экология форумы сиктәрендә үтә. Унда Силәбе, Свердловск, Ырымбур өлкәләре, шулай уҡ Татарстан Республикаһы вәкилдәре сығыш яһаясаҡ.

“Марафондың төп маҡсаты – тәжрибә уртаҡлашыу, айырым һаҡланған тәбиғәт биләмәләренең ғәмәлдәге моделдәрен күрһәтеү. Иң яҡшы өлгөләр башҡа биләмә­ләрҙә ҡабатланасаҡ”, – тип хәбәр итте Башҡортостан Экология һәм тәбиғәттән файҙаланыу министр­лығының матбуғат секретары Нина Никандрова.
Марафонда ҡатнашыусылар өсөн профессионалдар һәм үҫ­мер­ҙәр өсөн иҫәпләнгән өс маршрут әҙерләнгән. Тәүгеһе “Ирәмәл” тәбиғәт паркында, “Көньяҡ Урал” ҡурсаулығында, “Мораҙым тарла­уығы” тәбиғәт паркында һәм “Башҡортостан” милли паркында ойошторолған.
Икенсе маршрут марафонында ҡатнашыусыларға Башҡортостан дәүләт ҡурсаулығында, “Көньяҡ Урал” ҡурсаулығында, “Шүлгән­таш” ҡурсаулығында, “Мораҙым тарлауығы” тәбиғәт паркында һәм “Башҡортостан” милли паркында булырға тәҡдим ителәсәк.
Өсөнсө маршрут мәктәп уҡыу­сылары өсөн әҙерләнгән. Төрлө олимпиадаларҙа, экологик дис­цип­линаларҙа ҡатнашҡан 20 уҡыу­сы етәкселәре менән “Асылыкүл”, “Ҡандракүл”, “Мораҙым тарла­уығы” тәбиғәт парктарының һәм “Башҡортостан” милли паркының матурлығын ҡарай аласаҡ.