“Башҡортостан Республикаһының 100 йыллығына — 100 объект” программаһына ярашлы төҙөлгән “Күк сәскә” балалар баҡсаһы бөгөн тышҡы яҡтан да, эстән дә бик матур. Яңауылдар бындай бүләккә һаман да һөйөнөп бөтә алмай. Ысынлап та, учреждение тирә-яҡҡа йәм өҫтәп, үҙенә әллә ҡайҙан тартып тора. Күркәм объектты Өфөнөң “Эстра” яуаплылығы сикләнгән йәмғиәте төҙөгән.

Ике ҡатлы бина һигеҙ төр­көмгә иҫәпләнгән. Балалар баҡсаһында йоҡо, уйын бүл­мәләре, музыка, гимнастика залдары, өҫтәмә дәрестәр өсөн махсус бүлмәләр, логопед һәм психолог кабинеттары, уйын зонаһы, физкультура майҙансығы бар. Зауыҡ менән биҙәлгән балалар баҡсаһы газ ярҙамында йылытыла. Аш-һыу бүлмәһенә лә яңы ҡорамалдар ҡуйыл­ған, ҡыҙ һәм малайҙарға айырым бәҙрәф, йыуыныу бүлмә­ләре ҡаралған. Объекттың төҙөлөш-монтаж эштәренең дөйөм хаҡы 97 миллион һум тәшкил иткән.

“Күк сәскә” балалар баҡса­һы урынлашҡан квартал йәш әле, бында яңы барлыҡҡа кил­гән ғаиләләр күпләп йә­шәй. Һуңғы йылдарҙа ҡала­ның был районында халыҡты авария хәлендәге торлаҡтан кү­сереү программаһы буйынса бер нисә күп ҡатлы йорт саф­ҡа ингән. Ә быға тиклемге балалар баҡсаһы бик насар торошта булған, етмәһә, оҙаҡ ваҡыт сират та көткәндәр. Урын­дағы етәкселек, яңы социаль объект биҫтәнең инфра­структураһын яҡшыр­тыр һәм уның абруйын күтәрер, тип өмөтләнә.

— 1970 йылда сафҡа ин­де­релгән балалар баҡсаһы ныҡ иҫкергәйне, ҡыш һыуыҡ булһа, йәй көндәрендә ҡайһы саҡ түшәмдән ямғыр ҙа үтә ине, — ти баҡса мөдире Татьяна Смольникова. — Бөгөн, шөкөр, заманса йылы, яҡты, иркен һәм зауыҡ менән йыһазландырылған бинала эшләргә мөмкинлек тыуҙы. Хәҙер беҙгә балалар ҙа, атай-әсәйҙәр ҙә иртән ҙур теләк менән килә.

Бында әле 160 бала шө­ғөл­ләнә, сабыйҙарын нәҡ ошо баҡсаға бирергә теләү­селәр ҙә бар икән. Эш һөйөүсән, та­тыу коллектив йыйылған, балаларға 13 тәрбиәсе, махсус белемле биш белгес тәр­биә бирә. Баҡса яны майҙан­сығы ла иркен, рәхәтләнеп уйнарға уңайлы шарттар бул­дырылған. Төркөмдәрҙә кес­кәй­ҙәрҙең йәш үҙенсә­лектә­ренә ярашлы дәрестәр алып барыла. Бында улар тирә-яҡты танып белеп, телмәр­ҙәрен үҫтереп, төп төшөнсә­ләр менән генә танышып ҡал­май, ә коллективта йәшәргә, аралашырға, уйнарға өйрәнә. Танып белеү дәрестәрендә балалар төрлө милли әҙә­биәт, ауыҙ-тел халыҡ ижады, Ватан тарихы, төбәктең иҫтә­лекле урындары менән таны­ша, хәрәкәтле халыҡ уйында­рында ҡат­наша. Былар бары­һы ла милли үҙаң үҫешенә булышлыҡ итә һәм башҡа милләт вәкилдәренә ҡарата хөрмәт тойғоһо тәрбиәләй.
Мәктәпкәсә учреждение тормошонда ата-әсәләр ҙә әүҙем ҡатнаша, улар – тәр­биә­селәрҙең уң ҡулы һәм кә­ңәшсеһе лә. Ғәзиздәренең баҡсалағы тормошон ҡыҙыҡ­һынып күҙәтәләр һәм төрлө байрам-кисәләргә, иртә­лек­тәр­гә ҙур теләк менән киләләр.