Бала тип тормаҫтар

— 12 йәшлек улым билетһыҙ килеш ҡала автобусында тотолған. Уға штраф һалғандар. Был дөрөҫмө?


— Рәсәй Федерацияһының Административ хоҡуҡ боҙоуҙар тураһында кодексының 2.3-сө статьяһына ярашлы, административ яуаплылыҡҡа 16 йәше тулған кеше тарттырыла. Тимәк, балаға штраф һалырға ярамай. Әммә шул уҡ Кодекстың 11.18-се статьяһынан күренеүенсә, өлөшләтә административ яуаплылыҡҡа тарттырырға мөмкин. Уның буйынса, баланы билетһыҙ йөрөткән өсөн уға өлкән пассажирға ҡаралған штрафтың яртыһы һалына ала.

Паспортһыҙ ярамай

— Паспорт алмаштырыу йәшем тулды, әммә быны эшләргә һаман “ҡул етмәй”. Миңә нисә һум штраф ҡаралған?


— Был һорауға яуапты шулай уҡ Административ хоҡуҡ боҙоуҙар кодексынан эҙләргә кәрәк. Уның 19.15-се статьяһына ярашлы, шәхес танытмаһы (паспорты) булырға тейеш. Рәсәй Федерацияһы гражданы паспортһыҙ йәки ғәмәлдә булмаған паспортһыҙ йәшәһә, уға 1500-ҙән 2500 һумғаса штраф һалынырға тейеш. Әйткәндәй, был теркәүһеҙ йәшәүселәргә лә ҡағыла.

Сикләү бөттө

— Элек хосусилаштырырға мөмкин булған ер участкалары һаны сикләнә ине. Был хаҡтағы закон һаман ғәмәлдәме?


— “Айырым күсемһеҙ милек объекттарына ябайлаштырылған тәртиптә граждандар хоҡуғын рәсмиләштереү мәсьәләһе буйынса Рәсәй Федерацияһының ҡайһы бер ҡануниәт акттарына үҙгәрештәр индереү тураһында”ғы Федераль законға (№93-ФЗ, 30.06.2006 йыл) ярашлы, элек булған сикләүҙәр бөтөрөлдө. Хәҙер күпме теләйһегеҙ, шул тиклем ерҙе хосусилаштыра алаһығыҙ.