Бөгөн — Азамат Илембәтовтың республика Хөкүмәте Премьер-министры вазифаһына тәғәйенләнеүенә бер йыл. Ошо уңайҙан “Комсомольская правда” гәзитендә Хөкүмәт башлығы журналистар менән осрашыу ойошторҙо.
Азамат Фәттәх улы башта “Ҙур химия” Халыҡ-ара форумы хаҡындағы фекере менән уртаҡлашып, сараның ойошҡан рәүештә, уңышлы үтеүен билдәләне.
— Властың барыһы өсөн дә асыҡ булырға ынтылышы шарттарында республикала иҡтисадты үҫтереүгә йүнәлтелгән төрлө форум, инвесторҙар менән осрашыуҙар йыш ойошторола, — тине ул. — Былтырғы һөҙөмтәләргә ҡарағанда, башҡарған төп бурыстарыбыҙҙан тыш, республиканың иҡтисадын демократлаштырыуға күп көс һалынды. Инвестицияны йәнләндереү маҡсатында бер нисә закон ҡабул ителде. Эшмәкәрлегебеҙҙең аныҡ һөҙөмтәһе күренә башланы.
Башҡортостан халыҡты торлаҡ-коммуналь хужалыҡ хеҙмәте менән сифатлы тәьмин итеү буйынса Рәсәйҙә алдынғы урында килә. Премьер-министрҙың әйтеүенсә, республика быйылғы йылытыу миҙгеленә 15 сентябрҙә әҙер буласаҡ.
— Приют ҡасабаһында фажиғәле хәл булыуына ҡарамаҫтан, быйыл да илдә алдынғылар рәтендә ҡалырбыҙ, тип уйлайым, — тине Азамат Фәттәх улы. — Әйткәндәй, 19 майҙа ҡасабала бер йорт файҙаланыуға тапшырыла. Республика Президентының ҡушыуы буйынса башҡарылған төҙөлөш эше ике айҙа атҡарылды. Яңы йортта шартлауҙан зыян күргән ғаиләләр йәшәйәсәк.
Премьер-министр социаль торлаҡ, балалар баҡсалары төҙөү, урамдарҙы төҙөкләндереү, хеҙмәт хаҡы, ауыл хужалығы тармаҡтарына ҡағылышлы һорауҙарға тулы яуап бирҙе, республиканың үҫеш проблемаларын, ҡаҙаныштарын даими яҡтыртып барған журналистарҙың эшендә уңыштар теләне.