Башҡортостан Башлығы Рөстәм Хәмитов Республика йортонда Йәмәғәт палатаһы рәйесе Ольга Панчихина менән осрашты. Осрашыуҙа Дәүләт Йыйылышы – Ҡоролтайға һайлауҙы ойоштороу, Йәмәғәт палатаһының ошо эштә ҡатнашыу мәсьәләләре тикшерелде.

Ольга Панчихина әйтеүенсә, пала­та­ның бишенсе составы икенсе йыл эшләй. Һуңғы ваҡытта федераль ҡануниәттә төбәктәрҙәге йәмәғәт палаталарының вәкәләттәренә бәйле байтаҡ үҙгәрештәр булды. Атап әйткәндә, декабрҙә Рәсәй Президентын һайлауҙа йәмәғәт күҙәтеү­селәренең ҡатнашыуы тураһындағы закон көсөнә инде, июндә – Дәүләт Думаһы депутаттарын һайлау буйынса ошондай уҡ документ, июлдә иһә республика һәм урындағы әһәмиәттәге һайлауҙа йәмәғәт күҙәтеүселәрен тәғәйенләү буйынса закон ҡабул ителде.

– Һайлауҙы ғәҙел, асыҡтан-асыҡ үткәреү беҙҙең өсөн бик мөһим. Был тематикаға ҡағылышлы фараздар, имеш-мимештәр ғәҙәттә күп була. Йыш ҡына улар халыҡта ышанмаусанлыҡ тыуҙыра. Әммә беҙҙең бурыс – бер нәмәгә ҡара­маҫтан, һайлауҙы ғәҙел һәм асыҡ итеп үткәреү, – тине Рөстәм Хәмитов. – Бе­ле­үемсә, Рәсәй Президентын һайлау осо­ронда һеҙ ярайһы уҡ яҡшы эшлә­негеҙ, йәмәғәт күҙәтеүселәре булараҡ ҡатнаштығыҙ. Дәүләт Йыйылышы – Ҡо­ролтайға һайлауҙа ла ярҙамығыҙ кәрәк. Һынатмаҫһығыҙ тигән ышаныстамын.