Ошо көндәрҙә Башҡортостанда партия проекттары нигеҙендә төҙөкләндерелгән 300-ҙән ашыу майҙансыҡ асыла. “Реаль эштәр” көндәре акцияһы барышында ихата байрамдары, спорт ярыштары ойошторола, художество үҙешмәкәрлек коллективтары сығыш яһай.

Акцияға тәүгеләрҙән булып Миш­кә районы ҡушылды. Бында “Берҙәм Рәсәй” партияһының проекты ниге­ҙен­дә төҙөкләндерелгән объекттар асылыу тантаналары үт­те. Ошо маҡ­сатҡа районға республика ҡаҙнаһы­нан 2 миллион һумдан ашыу аҡса бүленде.

Үрге Сорокин һәм Яңы Троицкий мәктәптәре, Сабыҡ, Бикшик, Ҡайраҡ, Иҫке Арзамат, Яңы Килмәт, Илек ауыл клубтары яңырҙы. Яңы Ҡарас ауылында Бөйөк Ватан һуғышы ветерандарына обелиск барлыҡҡа килде.

Күмертауҙа партия проекты буйынса 26-сы “Алтын балыҡ” балалар баҡсаһына һаулыҡ мөмкинлеге сик­лән­гән балалар өсөн уйын майҙан­сығына ҡорамал һатып алынды. Ошо маҡсатҡа 400 мең һумдан ашыу аҡса тотонолдо.

“Реаль эштәр” көндәре Баш­ҡорт­ос­танда 27 августан 10 сен­тябргә тиклем дауам итә. Сара “Реаль эштәр”, “Ҡала мөхите” һәм “Атайсал мәҙәниәте” партия проекттарын 2018 йылда тормош­ҡа ашырыу йомғаҡ­тарына арнала. Быйыл “Реаль эш­тәр” нигеҙендә һайлау­сыларҙың 900-ҙән ашыу наказы үтәлә. Респуб­лика ҡаҙнаһынан проектҡа 175 миллион һум самаһы аҡса тотонолған.

Уҙған өс йылда балалар баҡса­лары, мәктәптәр, мәҙәниәт йорттары һәм клубтар төҙөкләндерелгән. Был учреждениелар өсөн ҡорамалдар, кәрәк-яраҡ һатып алынған, ҡыйыҡ­тар йүнәтелгән, тәҙрәләр алмашты­рылған. 600-ҙән ашыу спорт һәм балалар майҙансыҡтары файҙа­ланыуға тапшырылған, биләмәләрҙе төҙөкләндереү эше башҡарылған, электр, һыу һәм йылылыҡ тәьминәте яҡшырған, хәрби дан аллеялары, һәйкәлдәр тәртипкә килтерелгән. Граждандарҙың йәмғеһе 2800-ҙән ашыу башланғысы тормошҡа ашырылған.