Башҡортостан Дәүләт Йыйылышы – Ҡоролтай йортонда республика парламентының сираттағы 52-се ултырышы булды. Унда республика прокуроры Андрей Назаров “Башҡортостан Республикаһында законлылыҡ торошо тураһында”ғы, Башҡортостан Республикаһында Эшҡыуарҙар хоҡуҡтарын яҡлау буйынса вәкил Рафаил Ғибәҙуллин “2017 йылда Башҡортостан Республикаһында эшҡыуарлыҡ эшмәкәрлеге субъекттарының хоҡуҡтарын һәм законлы мәнфәғәттәрен үтәү тураһында”ғы докладтар менән сығыш яһаны.

Андрей Назаров билдәлә­үенсә, былтыр республикала граждандарҙың социаль хоҡуҡ­тарын боҙоу буйынса 56 меңдән ашыу осраҡ асыҡланған, 25 меңдән ашыу мөрә­жәғәт һәм ғариза судҡа ебәрелгән. Хеҙмәт хоҡуҡтарын боҙоу ҙа етди борсолоу тыуҙыра. Прокуратура 600 миллион һумдан ашыу эш хаҡын түләттереүгә өлгәшкән. Бер меңдән ашыу вазифалы кеше – административ, 856-һы дисциплинар яуаплылыҡҡа тарттырыл­ған, 32 осраҡ буйынса енәйәт эше ҡуҙғатылған. Күҙәтеү органы торлаҡҡа хоҡуҡты тергеҙеү буйынса ла һөҙөмтәле эшләгән, иҡтисад өлкәһендә былтыр 18 меңдән ашыу хоҡуҡ боҙоу осрағы асыҡланған. Улар араһында за­конһыҙ балыҡ тотоу, коррупцияға ҡаршы көрәш тураһындағы ҡануниәтте боҙоу, сифатһыҙ торлаҡ төҙөү, етем балаларҙың торлаҡҡа хоҡуғын, инвалид­тарҙың дарыу алыуға хоҡуҡтарын һәм социаль инфраструктура объекттарына ҡаршылыҡһыҙ инеү мөмкинлеген боҙоу осраҡтары киң таралған.
Рафаил Ғибәҙуллин әйтеүен­сә, әле республикала 140 меңгә яҡын бәләкәй һәм урта эшҡы­уарлыҡ субъекты эшләй, шул иҫәптән былтыр улар 12 меңгә артҡан. Бәләкәй бизнес тулайым төбәк продуктының өстән бер өлөшө тирәһен тәьмин итә.
Ул контроль-күҙәтеү органдары тарафынан ойошторолған тикшереүҙәрҙә Эшҡы­уарҙарҙың хоҡуҡтарын яҡлау буйынса вәкил аппараты хеҙмәткәрҙәренең ҡатнашыуы тураһында ла билдәләне. Шулай уҡ яңы эш башлаусыларҙың хоҡуҡи белем­дәренең етмәүе хаталаныуҙарға алып килеүе хаҡында белдерҙе.
Депутаттар ултырышта 20-нән ашыу республика законы проектын тикшерҙе. Уларҙың күбеһе беренсе уҡыуҙа тәҡдим ителде. Улар араһында “Баш­ҡортостан Республикаһында күп балалы ғаиләләрҙе дәүләт яҡ­лауы тура­һында” Башҡортос­тан Законына үҙгәрештәр индереү тураһында”, “Башҡорт­остан Республикаһында дәүләт милкен хосусилаштырыу тураһында” Башҡортостан Законына үҙгәрештәр индереү тураһында”, “Башҡортостан Рес­публика­һында торлаҡ мөнәсәбәттәрен көйләү тураһында” Башҡорт­остан Законына үҙгәрештәр индереү тураһында”, “Етештереү һәм ҡулланыу ҡалдыҡтары тураһында” Башҡортостан Законына үҙгәрештәр индереү тураһында” закон проекттары ҡаралды.