Башҡортостан Йәмәғәтселек палатаһының тәүге ултырышы булып үтте. Саранан һуң палата ағзалары рес­публикабыҙ Башлығы Рөстәм Хәмитов менән осрашты.

– Был абруйлы ойошмаға һай­ланыуығыҙ менән барығыҙҙы ла ихлас ҡотлайым! Йәмғиәте­беҙҙә хәл ителмәгән мәсьәләләр ифрат күбәйҙе, беҙ улар менән шөғөл­ләнеү түгел, ҡайһы ваҡыт асылына төшөнөргә лә өлгөрмәй­беҙ, – тине Рөстәм Зәки улы. – Хәҙерге шарт­тарҙа власть үҙе генә барыһын да эшләп өлгөрә алмай, йәмә­ғәтселектең ярҙамы кәрәк.
Палата ултырышының көн тәртибенә бер нисә һорау инде­рел­гәйне: рәйесте һәм уның урын­баҫарҙарын һайлау, комитеттар һанын, уларҙың эш йүнәлештәрен билдәләү.
Ултырышта әйтеп үтелгәнсә, күптән түгел ҡабул ителгән “Рәсәй Федерацияһы субъекттарында йәмәғәтселек палаталары ойош­тороуҙың һәм уларҙың эшмәкәр­легенең дөйөм принциптары тураһында”ғы Федераль законға ярашлы, Башҡортостандағы пала­таның эше лә яңы нигеҙҙә бара­саҡ. Уның ағзаларына кандидат­тарҙы дөйөм Рәсәй һәм тәбәк-ара коммерцияға ҡарамаған ойошмалар тәҡдим итте.
Утыҙ урынға барлығы 137 ғари­за бирелгәйне. Палатаның ярты­һынан ашыуы яңырҙы. Айырыуса урындағы ойошмаларҙың вәкил­леге артты. Бишенсе составта социаль эшҡыуарлыҡ һәм янғын хәүефһеҙлегенән алып мәғариф һәм һаулыҡ һаҡлау өлкәһенә саҡлы барлыҡ тармаҡтар ҙа бар. Шулай уҡ киң мәғлүмәт саралары, инвалидтар йәмғиәте, пенсионер­ҙар союзы, профсоюз ойошмала­ры һәм башҡалар ҙа онотол­маған.
Йәмәғәтселек палатаһы ағзала­рының вәкәләте ике йылдан өс йылға саҡлы оҙайтылды. Комиссиялары хәҙер бишәү (элек туғыҙ ине). Рәйес итеп икенсе тапҡыр һайланған Ольга Панчихина яңы составтың эшмәкәрлеге ниндәй йүнәлештәрҙә барасағы һәм нимәләргә өҫтөнлөк биреләсәге хаҡында һөйләне.