Рәсәйгә ҡарата булған нәфрәте менән Украина яңғыҙ ҡалыр, ахыры. Порошенко нисек кенә теләмәһен, илебеҙҙә үткән һайлауҙарҙы донъяның барлыҡ илдәре лә легитим тип билдәләне. Өҫтәүенә Рәсәйгә ҡаршы ҡулланылған санкцияларҙан баш тартырға теләүҙәре лә Украина етәкселегенең яраһына тоҙ булып һибелде. Был хаҡта Америка Ҡушма Штаттарының вице-президенты Джозеф Байден белдергәйне.

“Мәскәүгә ҡаршы иғлан ителгән санкцияларҙан бөгөндән баш тартырға теләгән кәмендә биш ил бар”, – тине Байден. Был һүҙҙәрен ул Нью-Йоркта Порошенко менән осрашҡандан һуң әйтте. Украина етәксеһе АҠШ прези­дентлығына кандидат Дональд Трамп менән дә осрашырға теләгәйне, ләкин уныһының ваҡыты булманы. Ә бына икенсе кандидат Хиллари Клинтон Порошенконың Донбассты оккупациялау хаҡында “әкиәтен” кинәнеп тыңланы, хатта килешкән­дәй баш ҡағып ултырҙы.
Күренеп тора, Европа Порошенконан да, санкцияларҙан да ялҡҡан. Был “һуғышты” артабан дауам итһендәр өсөн Германияны, Францияны, Италияны өгөтлә­үе Амери­ка­ға ҡыйынға тура килә, ти Байден. Санкциялар арҡаһын­да Европаның хәле көндән-көн мөшкөлләнә бара. Рәсәй менән сауҙа итеү юлын асыу­ҙы һорап, акциялар ойошторола.
Әлбиттә, Америка етәкселәре­нең мәкерле уйы буйынса, санкция иң беренсе беҙҙең илдең бәкәленә һуғырға тейеш ине, ләкин таяҡтың ике башлы булыуы тураһында улар уйлап та бир­мәне. Шуға күрә Европа илдәрен­дә санкцияларҙан баш тартыу тураһында һүҙҙәр йы­шы­раҡ ҡа­бат­лана. Хәҙер улар Ук­раина арҡа­һында иҡтисади көр­сөккә баш тығырға теләмәй. Астың асыуы яман тигәндәй, халыҡтың күтәре­леп китеүе лә шөрлә­тәлер. Ул саҡта санкция менән бергә ҡалын кеҫәлеләрҙең дә башы осоуы ихтимал.