Кисә иртәнсәк саммиттарҙың матбуғат үҙәгендә Рәсәй Президентының матбуғат секретары Дмитрий Песков 8 июлдәге эш йомғаҡтары тураһында һөйләне.

Уның белдереүенсә, Рәсәй һәм Бразилия президенттары Владимир Путин менән Дилма Руссефф араһында йөкмәткеле әңгәмә булған. Етәк­селәр атом энергетикаһы, Бразилия эш­ҡыуарҙарының Рәсәйгә аҙыҡ-түлек һатыу менән бәйле ҡыйынлыҡтары, ГЛОНАСС системаһы буйынса проблемалар, ғилми-техник хеҙмәттәшлек һәм башҡа мәсьәләләр тураһында ентекле һөйләшкән. Рәсәй Президенты шулай уҡ ике ил араһында быға саҡлы төҙөлгән килешеүҙәрҙең Бразилияла тиҙерәк раҫланыуын теләгән.
– Ҡунаҡтар ШОС һәм БРИКС сам­миттарының Рәсәйҙәге төрлө ҡалала үткәрелеүен хупланы, – тине матбуғат секретары. – Тимәк, был эш артабан да дауам итәсәк. Ул ойош­то­роу­сы­лар­ға ла отошло, сөнки осрашыу урыны матурая, төҙөкләндерелә.
“Рәсәйҙә футболдың абруйы төшә бара, шуға ҡара­маҫтан киләһе донъя чемпионаты барыбер беҙҙә үткә­ре­ләсәкме?” тигән һорауға Дмитрий Песков: “Һәр хәлдә, фут­бол иң популяр уйын булып ҡала, – тине. – Төрлө ысул менән баш­ҡарылған социологик фекер алыуҙар ғына ысынбарлыҡтағы хәлде үҙгәртә алмай. Рәсәй донъя ярыштарын юғары кимәлдә уҙғара алыуын күп тапҡыр иҫбатланы инде”.
Рәсәй менән Бразилия етәкселәре тәүҙә Украина темаһына ҡағылмаған, ләкин әңгәмә һуңында ул турала һүҙ булған. Владимир Путин Бразилияның был мәсьәләлә бик тотанаҡлы булыуын билдәләгән. Ә Грецияла ойош­торолған һәм бөтөн донъяла шау-шыу тыуҙырған референдумға ҡарата сам­миттарҙа ҡатнашыусыларҙың аныҡ ҡына фекере әлегә юҡ.
“АҠШ, имеш, Бразилияны БРИКС ойош­ма­һы­нан баш тар­тырға өндәй, шул дөрөҫмө?” тигән һорауға Дмитрий Сергеевич: “Был һорау урын­лы түгел. АҠШ менән Бра­зилияның үҙ-ара мө­нә­сәбәте тураһында уларҙың үҙҙәренән генә белешергә мөмкин”, – тип яуап бирҙе.